505 
506
507 
508 
509 
510 
511 
512 
513 
514 
515
516
517 
518 

N
 
 
 
 
 
 
 
 
 

   Sone aftyr this creatur was mevyd in hir sowle to go vysyten certeyn places for
gostly helth inasmech as sche was cured, and mygth not wythowtyn consentyng of hir
husbond. Sche reqwired hir husbond to grawntyn hir leve, and, he, fully trostyng it
was the wyl of God, sone consentyng, thei went togedyr to swech place as sche was
mevyd. And than owyr Lord Cryst Jhesu seyd to hir, "My servawntys desyryn gretly
to se the." Than was sche wolcomyd and mech mad of in dyvers placys. Wherfor sche
had gret dred of veynglory and mech was aferde. Owyr mercyful Lord Cryst Jhesu,
worshepd be hys name, seyd to hir, "Drede the not, dowtyr, I schal take veynglory fro
the. For thei that worshep the thei worshep me; thei that despysen the thei despysen
me, and I schal chastysen hem therfor. I am in the, and thow in me. And thei that
heryn the thei heryn the voys of God. Dowtyr, ther is no so synful man in erth levyng,
yf he wyl forsake hys synne and don aftyr thi cownsel, swech grace as thu behestyst
hym I wyl confermyn for thi lofe." Than hir husbond and sche went forth to Yorke and
to other dyvers placys.