1904 
1905 
1906 
1907 
1908
1909
1910 
1911 
1912
1913 
1914 
1915 
1916 
1917 
1918 
1919 
1920
1921 
1922 
1923 
1924
1925 
1926 
1927 
1928
1929 
1930 
1931
1932
1933
1934 
1935 
1936 
1937 
1938 
1939 
1940 
1941 
1942 
1943 
1944
1945 
1946
1947 
1948 
1949 
1950
1951 
1952 
1953 
1954 
1955 
1956
1957
1958 
1959 
1960 
1961 
1962 
1963 
1964 
1965

N
 
 

N
 
 
 
 
 
 
 
 
 

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

   An other tyme, as this creatur was at Seynt Jonys Cherch Lateranens befor the
awter heryng the messe hir thowt that the preste whech seyd messe semyd a good man
and devowte. Sche was sor mevyd in spiryt to speke wyth hym. Than sche preyd hir
man wyth the brokyn bak for to gon to the preste and preyn hym to spekyn wyth hir.
Than the preste undirstod non Englysch ne wist not what sche seyd, and sche cowde
non other langage than Englisch, and therfor thei spokyn be an interpretowr, a man
that telde her eythyr what other seyde. Than sche preyd the preste in the name of
Jhesu that he wolde makyn hys preyeris to the blysful Trinité, to owir Lady, and to
alle the blissed sentys in hevyn, also steryn other that lovedyn owir Lord to preyn for
hym, that he myth han grace to undirstondyn hir langage and hir speche in swech
thyngys as sche thorw the grace of God wold seyn and schewyn unto hym. The preste
was a good man, and of hys birth he was a Dewcheman, a good clerke, and a wel
lernyd man, hily belovyd, wel cherschyd, and myche trostyd in Rome, and had on of
the grettest office of any preste in Rome. Desyryng to plese God, he folwyd the cownsel
of this creatur, and mad hys praerys to God devowtly as he cowde every day that he
myth han grace to undirstandyn what the forseyd creatur wolde seyn to hym, and also
he mad other loverys of owyr Lord to prey for hym. Thus thei preyd therten days. And
aftyr therten days the preste cam ageyn to hir to prevyn the effect of her preyerys, and
than he undirstod what sche seyd in Englysch to hym and sche undirstod what that he
seyd. And yet he undirstod not Englisch that other men spokyn; thow thei spokyn the
same wordys that sche spak, yet he undirstod hem not les than sche spak hirselfe.
Than was sche confessyd to this preste of alle hir synnes as ner as hir mende wold
servyn hir fro hir childhode unto that owre and receyved hir penawns ful joyfully.
And sithyn sche schewyd hym the secret thyngys of revelacyonys and of hey
contemplacyons, and how sche had swech mend in hys Passyon and so gret compassyon
whan God wolde geve it that sche fel down therwyth and myth not beryn it. Than sche
wept bittyrly, sche sobbyd boistowsly and cryed ful lowde and horybly that the pepil
was oftyntymes aferd and gretly astoyned, demyng sche had ben vexyd wyth sum
evyl spiryt, not levyng it was the werk of God but rathyr sum evyl spiryt, er a sodeyn
sekenes, er ellys symulacyon and ypocrisy falsly feyned of hir owyn self. The preste
had gret trost that it was the werk of God, and, whan he wolde mystrostyn, owyr Lord
sent hym swech tokenys be the forseyd creatur of hys owyn mysgovernawns and hys
levyng, the whech no man knew but God and he, as owyr Lord schewyd to hir be
revelacyon and bad hir tellyn hym, that he wist wel therby hir felyngys wer trewe.
And than this preste receyved hir ful mekely and reverently as for hys modyr and for
hys syster and seyd he wolde supportyn hir agen hir enmys. And so he dede as long as
sche was in Rome and sufferd many evyl wordys and meche tribulacyon. And also he
forsoke hys office becawse that he wolde supportyn hir in hir sobbyng and in hir
crying whan alle hir cuntremen had forsakyn hir, for thei weryn evyr hir most enmys
and cawsyd hir mych hevynes in every place ther they comyn, for thei wold that sche
schulde neythyr a sobbyd ne cryed. And sche myth nowt chesyn, but that wolde thei
not belevyn. And ther thei wer evyr ageyn hir and ageyn the good man whech supportyd
hir. And than this good man, seyng this woman so wondirfully sobbyn and cryin, and
specialy on Sondays whan sche schuld ben howselde among alle the pepyl, purposyd
hym to prevyn whethyr it wer the gyfte of God, as sche seyd, er ellys hir owyn feynyng
by ypocrisy, as the pepyl seyd, and toke hir alone an other Sonday into an other chirche
whan mes was don and alle the pepil was hom, no man wetyng therof saf hymself and
the clerk only. And, whan he schulde howselyn hir, sche wept so plentyuowsly and
sobbyd and cryed so lowde that he was astoyned hymself, for it semyd to hys heryng
that sche cryed nevyr so lowde befor that tyme. And than he belevyd fully that it was
the werkyng of the Holy Gost and neithyr feynyng ne ypocrisé of hir owyn self. And
than aftyrward he was not abasshyd to heldyn wyth hir and to spekyn agens hem that
wolde defamyn hir and spekyn evyl of hir tyl he was detractyd of the enmys of vertu
nerhand as mech as sche, and that lykyd hym wel to suffir tribulacyon for Goddys
cawse. And meche pepyl in Rome that wer disposyd to vertu lovyd hym meche the
mor and hir also and oftyntymes preyd hir to mete and madyn hir ryth gret cher,
preyng hir to prey for hem. And evyr hir owyn cuntremen wer obstynat, and specyaly
a preste that was amonx hem. He steryd meche pepyl agen hir and seyd mech evyl of
hir, for sche weryd white clothyng mor than other dedyn whech wer holyar and bettyr
than evyr was sche as hym thowt. The cawse of hys malyce was for sche wold not
obeyn hym. And sche wist wel it was ageyn the helth of hir sowle for to obeyn hym as
he wolde that sche schulde a don.