1966 
1967 
1968 
1969 
1970 
1971 
1972
1973 
1974 
1975 
1976 
1977 
1978 
1979
1980
1981 
1982 
1983 
1984 
1985 
1986
1987
1988 
1989 
1990 
1991 
1992
1993 
1994
1995
1996
1997
1998
1999

   Than the good man, the Duche preste that sche was schrevyn onto, thorw the steryng
of the Englysch preste whech was hir enmye askyd hir yf sche wolde be obedient unto
hym er not. And sche seyd, "Ya, syr." "Wyl ye don than as I schal byd yow don?"
"Wyth ryth good wyl, sire." "I charge yow than that ye leve yowr white clothys, and
weryth ageyn yowr blak clothys." And sche dede hys comawndment. And than had
sche felyng that sche plesyd God wyth hir obediens. Than suffyrd sche many scornys
of wyfys of Rome. Thei askyd hir yyf malendrynes had robbyd hir, and sche seyd,
"Nay, madame." Sythen, as sche went on pylgrimage, it happyd hir to metyn wyth the
preste that was hir enmye, and he enjoyid gretly that sche was put fro hir wille and
seyd unto hir, "I am glad that ye gon in blak clothyng as ye wer wont to do." And sche
seyd agen to hym, "Ser, owyr Lord wer not displesyd thow I weryd whyte clothys, for
he wyl that I do so." Than the preste seyd to hir agen, "Now wote I wel that thu hast a
devyl wythinne the, for I her hym spekyn in the to me." "A, good ser, I pray yow
dryvyth hym away fro me, for God knowyth I wolde ryth fawyn don wel and plesyn
hym yf I cowde." And than he was ryth wroth and seyd ful many schrewyd wordys.
And sche seyd to hym, "Ser, I hope I have no devyl wythinne me, for, yyf I had a
devyl wythin me, wetyth wel I schuld ben wroth wyth yow and, sir, me thynkyth that
I am nothyng wroth wyth yow for no thyng that ye can don onto me." And than the
preste partyd awey fro hir wyth hevy cher. And than owyr Lord spak to this creatur in
hir sowle and seyd, "Dowtyr, drede the not what that evyr he sey onto the, for, thow
he renne every yer to Jerusalem, I have no deynté of hym, for as long as he spekyth
ageyns the, he spekyth ageyns me, for I am in the and thu art in me. And herby mayst
thow knowyn that I suffyr many schrewyd wordys, for I have oftyntymes seyd to the
that I schuld be newe crucifyed in the be schrewyd wordys, for thu schalt non otherwyse
ben slayn than be schrewyd wordys sufferyng. For this preste that is thyn enmy he is
but an ypocryte." Than the good preste hir confessowr bad hir be vertu of obediens
and also in party of penawns that sche schulde servyn an hold woman that was a poure
creatur in Rome. And sche dede so sex wekys. Sche servyd hir as sche wolde a don
owyr Lady. And sche had no bed to lyn in ne no clothys to be cured wyth saf hir owyn
mentyl. And than was sche ful of vermyn and suffyrd gret peyn therwyth. Also sche fet
hom watyr and stykkys in hir nekke for the poure woman and beggyd mete and
wyn bothyn for hir. And, whan the pour womans wyn was sowr, this creatur hirself
drank that sowr wyn and gaf the powr woman good wyn that sche had bowt for hir
owyn selfe.