2338
2339
2340
2341 
2342
2343 
2344 
2345 
2346
2347
2348 
2349 
2350 
2351 
2352 
2353 
2354
2355
2356
2357 
2358
2359 
2360 
2361 
2362 
2363 
2364 
2365 
2366
2367 
2368 
2369 
2370 
2371 
2372
2373 
2374 
2375 
2376
2377 
2378 
2379
2380 
2381 
2382
2383 
2384 
2385 
2386 
2387 
2388


 
 
 
 

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

 

   42
 
 

Whan tyme of Estern er ellys Paske was come and go, this creatur wyth hir 
felawschep, purposyng to gon ageyn into her owyn natyf lond, it was telde hem that 
ther wer many thevys be the wey whech wolde spoyl hem of her goodys and peraventur 
slen hem. Than the seyd creatur wyth many a bittyr teer of hir eye preyd to owr Lord 
Jhesu Crist, seying, "Crist Jhesu, in whom is al my trost, as thow hast behyte me many 
tymes befor that ther schulde no man be disesyd in my cumpanye, and I was nevyr 
deceyved ne defrawdyd in thi promysse as long as I fully and trewly trostyd onto the, 
so here the preyerys of thin unworthy servawnt al holy trustyng in thi mercy. And 
grawnt that I and myn felawschep wythowtyn hyndryng of body er of catel, for of owr 
sowlys, Lord, have thei no powr, may gon hom ageyn into owr lond lych as we come 
hedyr, for thi lofe, and late nevyr owr enmiis have no powr ovyr us, Lord, yyf it plese 
the. As thu wilt, so mot it be." Than owr Lord Jhesu Crist seyd to hir mende, "Drede 
the not, dowtyr, for thu and alle that ben in thy cumpany schal gon as safe as yyf thei 
wer in Seynt Petrys Cherch." Than thankyd sche God wyth alle hir spiritys, and was 
bold anow to go wher God wolde, and toke hir leve of hir frendys in Rome, and most 
specyaly of hir gostly fadyr, whech, for owr Lordys lofe, had supportyd hir and socowrd 
hir ful tendirly ageyn the wykked wyndys of hir invyows enmyis, whos departyng 
was ful lamentabyl as wytnessyd wel the pur watyrdropys rennyng down be her chekys. 
Sche, fallyng on hyr knes, receyved the benefys of hys blyssyng, and so departyd 
asundyr whom charité joyned bothyn in oon, thorw the whech thei trostyd to metyn 
ageyn, whan owr Lord wolde, in her kendly cuntré whan thei wer passyd this wretchyd 
wordelys exile. And thus sche and hir felaschep passyd forth into Inglondward. And 
whan thei wer a lityl wey owte of Rome, and the good preste, whech as is beforn 
wretyn this creatur had receyved as for hir owyn sone, had mekyl drede of enmyis. 
Wherfor he seyd onto hir, "Modyr, I drede me to be deed and slayn wyth enmyis." 
Sche seyd, "Nay, sone, ye schal far ryth wel and gon saf be the grace of God." And he 
was wel comfortyd wyth hyr wordys, for he trustyd meche in hir felyngys and mad hir 
as good cher be the wey as yyf he had ben hir owyn sone born of hir body. And so thei 
cam forth to Medylborwgh, and than hir felaschep wolde takyn her jurné into 
Inglondward on the Sunday. Than the good preyste cam to hir, seying, "Modyr, wyl 
ye gon wyth yowr felaschep er not on this good day?" And sche seyde, "Nay, sone, it 
is not my Lordys wille that I schulde gon so sone hens." And so sche abood stylle wyth 
the good preste and summe other of the felaschyp tyl the Satyrday aftyr. And mech of 
her felaschep went to schip on the Sonday. On the Fryday aftyr, as this creatur went to 
sportyn hir in the felde and men of hir owyn nacyon wyth hir, the whech sche informyd 
in the lawys of God as wel as sche cowde; and scharply sche spak ageyns hem for thei 
sworyn gret othys and brokyn the comawndment of owr Lord God. And as sche went 
thus dalying wyth hem, owr Lord Jhesu Crist bad hir gon hom in haste to hir hostel, 
for ther schulde come gret wederyng and perlyows. Than sche hyed hir homwardys 
wyth hir felaschep, and, as sone as thei come hom to her hostel, the wederyng fel as 
sche felt be revelacyon. And many tymes, as sche went be the wey and in the feldys, 
ther fel gret levenys wyth hedows thunderys, gresely and grevows, that sche feryd hir 
that it schulde a smet hir to deth, and many gret reynes, whech cawsyd in hir gret drede 
and hevynes. Than owr Lord Jhesu Crist seyd to hir, "Why art thow aferd whil I am 
wyth the? I am as mythy to kepyn the her in the felde as in the strengest chirche in alle 
this worlde." And aftyr that tyme sche was not so gretly aferd as sche was beforn, for 
evyr sche had gret trust in hys mercy, blyssed mote he be that comfortyd hir in every 
sorwe. And sithyn it happyd an Englyschman to come to this creatur and swor a gret 
oth. Sche, heryng that oth, wept, mornyd, and sorwyd wythowtyn mesur, not of powr 
to restreyn hirselfe fro wepyng and sorwyng, forasmeche as sche sey hir brothyr 
offendyn owr Lord God almygthy and lytyl heed wold takyn to hys owyn defawte.