4013
4014
4015 
4016 
4017 
4018 
4019 
4020 
4021 
4022 
4023 
4024 
4025
4026
4027 
4028 
4029
4030 
4031
4032
4033 
4034 
4035 
4036 
4037 
4038 
4039
4040
4041

N
 
 
 
 
 
 
 
 
 
 
 
 
 
 
 

On a tyme God visited the forseyd doctowr, Maystyr Aleyn, wyth gret sekenes that 
no man hith hym no lyffe that saw hym. And so it was teld the sayd creatur of hys 
sekenes. Than sche was ful hevy for hym, and specialy for as meche as sche had be 
revelacyon that sche schulde spekyn wyth hym ageyn as sche had don beforn, and, 
yyf he had deyd of this sekenes, hir felyng had not ben trewe. Therfor sche ran into the 
qwer at Seynt Margaretys Chirche, knelyng down beforn the Sacrament and seying 
on this wise, "A, Lord, I prey the, for alle goodnes that thu hast schewyd to me and as 
wistly as thu lovyst me, late this worthy clerk nevyr deyin tyl I may spekyn wyth hym 
as thu hast behite me that I schulde do. And thu, gloriows Qwen of Mercy, have mende 
what he was wont to seyn of the in hys sermownys. He was wont to seyin, Lady, that 
he was wel blissyd that had yow to hys frend, for, whan ye preyid, alle the cumpany of 
hevyn preyd wyth yow. Now for the blisful lofe that ye had to yowr Sone, late hym 
levyn tyl the tyme that he hath leve to speke wyth me and I wyth hym, for now we arn 
put asundyr be obediens." Than sche had answer in hir sowle that he schulde not dey 
befor the tyme that sche had leve to speke wyth hym and he wyth hir as thei had don 
yerys beforn. And, as owr Lord wolde, in schort tyme aftyr the worthy clerk recuryd 
and went abowtyn heyl and hool and had leve of hys sovereyn to spekyn wyth the 
sayd creatur. And sche had leve of hir confessowr to spekyn wyth hym. So it happyd 
the forseyd doctowr schulde dinyn in towne wyth a worschipful woman whech had 
takyn the mentyl and the ryng, and he sent for the sayd creatur to comyn and spekyn 
wyth hym. Sche, havyng gret merveyl therof, toke leve and went to hym. Whan sche 
cam into the place wher he was, sche myth not spekyn for wepyng and for joy that 
sche had in owr Lord, inasmeche as sche fonde hir felyng trewe and not deceyvabyl 
that he had leve to spekyn to hir and sche to hym. Than the worschepful doctowr seyd 
to hir, "Margery, ye ar wolcome to me, for I have long be kept fro yow, and now hath 
owr Lord sent yow hedyr that I may spekyn wyth yow, blissed mote he be." Ther was 
a dyner of gret joy and gladnes, meche mor gostly than bodily, for it was sawcyd and 
sawryd wyth talys of Holy Scriptur. And than he gaf the sayd creatur a peyr of knyvys 
in tokyn that he wolde standyn wyth hir in Goddys cawse, as he had don beforn tyme.