4042 
4043 
4044 
4045
4046 
4047
4048 
4049
4050 
4051 
4052 
4053 
4054 
4055 
4056 
4057 
4058 
4059 
4060 
4061
4062
4063
4064 
4065 
4066 
4067 
4068 
4069 
4070
4071 
4072 
4073
4074
4075
4076
4077 
4078 
4079

On a day ther cam a preyst to the sayd creatur whech had gret trust in hir felyngys 
and in hir revelacyons, desyryng to prevyn hem in divers tymes, and preyid hir to prey 
to owr Lord that sche myth have undirstondyng yyf the priowr of Lynne, whech was 
good maistyr to the sayd preyst, schulde be remownyd er not and, as sche felt, makyn 
hym trewe relacyon. Sche preyd for the forseyd mater, and, whan sche had answer 
therof, sche telde the preyste that the priowr of Lynne hys maistyr schulde be clepyd 
hom to Norwich and an other of hys brethyr schulde be sent to Lynne in hys stede. And 
so it was in dede. But he that was sent to Lynne abood ther but a lityl while er than he 
was clepyd hom to Norwych ageyn, and he that had ben priowr of Lynne beforn was 
sent ageyn to Lynne and dwellyd ther wel abowtyn four yer tyl he deyd. And in mene 
tyme the seyd creatur had oftyn felyng that he the whech was last clepyd hom to 
Norwich and abood but lityl while at Lynne schulde yet ben priowr of Lynne agen. Sche 
wolde geve no credens therto inasmeche as he had ben ther and was in lityl tyme 
clepyd hom ageyn. Than, as sche went on a tyme in the White Frerys Cherch at Lynne 
up and down, sche felt a wondyr swet savowr and an hevynly that hir thowt sche myth 
a levyd therby wythowtyn mete or drynke yyf it wolde a contynuyd. And in that tyme 
owr Lord seyd unto hir, "Dowtyr, be this swet smel thu mayst wel knowyn that ther 
schal in schort tyme be a newe priowr in Lynne, and that schal ben he whech was last 
remownd thens." And sone aftyr the elde priowr deyid, and than owr Lord seyd to hir 
as sche lay in hir bed, "Dowtyr, as loth as thu art to levyn my steryngys, yet schal thu 
se hym of whom I schewyd the beforn priowr of Lynne er this day sevenyth." And so 
owr Lord rehersyd hir this mater ech day the sevenyth tyl sche sey it was so in dede, 
and than was sche ful glad and joyful that hir felyng was trew. Sithyn, whan this 
worshepful man was comyn to Lynne and had dwellyd ther but lytil while, whech was 
a wol worschepful clerk, a doctowr of divinité, he was poyntyd for to gon ovyr the see 
to the Kyng into Frawnce and other clerkys also of the worthyest in Ynglond. Than a 
preyste that had an offyce undyr the sayd priowr cam to the forseyd creatur and besechyd 
hir to have this mater in mende whan God wolde mynystyr hys holy dalyawnce to hir 
sowle and wetyn in this mater whethyr the priowr schulde gon ovyr the se er not. And so 
sche preyid to have undirstondyng of this mater, and sche had answer that he schulde 
not gon. Nevyrthelesse he wend hymself to a gon and was al purveyd therfor and wyth 
gret hevynes had takyn leve of hys frendys, supposyng nevyr to a comyn ageyn, for he 
was a ful weyk man and a febyl of complexion. And in the menetyme the kyng deyid, 
and the priowr bood at hom. And so hir felyng was trewe wythowtyn any deceyte. 
Also it was voysyd that the Bischop of Wynchestyr was ded, and notwythstandyng 
sche had felyng that he levyd. And so it was in trewth. And so had sche felyng of 
many mo than be wretyn whech owr Lord of hys mercy revelyd to hir undirstondyng, 
thow sche wer unworthy of hir meritys.