4128
4129
4130 
4131 
4132
4133 
4134
4135 
4136 
4137 
4138
4139
4140 
4141 
4142 
4143 
4144 
4145 
4146 
4147 
4148 
4149
4150 
4151 
4152 
4153 
4154 
4155
4156 
4157 
4158
4159
4160
4161 
4162 
4163 
4164 
4165 
4166

N
 
 
 
 
 
 
 
 
 
 
 
 
 
 
 
 
 
 

N
 
 
 
 
 
 
 
 
 
 
 
 
 
 

On the Holy Thursday, as the sayd creatur went processyon wyth other pepil, sche 
saw in hir sowle owr Lady, Seynt Mary Mawdelyn, and the twelve apostelys. And than 
sche beheld wyth hir gostly eye how owr Lady toke hir leve of hir blysful Sone, Crist 
Jhesu, how he kyssed hir and alle hys apostelys and also hys trewe lover, Mary 
Mawdelyn. Than hir thowt it was a swemful partyng and also a joyful partyng. Whan 
sche beheld this sygth in hir sowle, sche fel down in the feld among the pepil. Sche 
cryid, sche roryd, sche wept as thow sche schulde a brostyn therwith. Sche myth not 
mesuryn hirself ne rewlyn hirselfe, but cryid and roryd that many man on hir wonderyd. 
But sche toke non heed what ony man seyd ne dede, for hir mende was ocupyid in owr 
Lord. Sche felt many an holy thowt in that tyme whech sche cowde nevyr aftyr. Sche 
had forgetyn alle erdly thyngys and only ententyd to gostly thyngys. Hir thowt that al
hir joy was ago. Sche sey hyr Lord steyn up into hevyn, for sche cowde not forberyn 
hym in erde. Therfor sche desiryd to a gon wyth hym, for al hir joy and al hir blysse 
was in hym and sche knew wel that sche schulde nevyr han joy ne blys tyl sche come to 
hym. Swech holy thowtys and swech holy desirys cawsyd hir to wepyn, and the pepil 
wist not what hir eylyd. An other tyme the seyd creatur beheld how owr Lady was, hir 
thowt, in deying and alle the apostelys knelyng beforn hir and askyng grace. Than 
sche cryid and wept sor. The apostelys comawndyd hir to cesyn and be stille. The 
creatur answeryd to the apostelys, "Wolde ye I schulde see the Modyr of God deyin and 
I schulde not wepyn? It may not be, for I am so ful of sorwe that I may not wythstonde 
it. I must nedys cryin and wepyn." And than sche seyd in hir sowle to owr Lady, "A, 
blyssyd Lady, prey for me to yowr Sone that I may come to yow and no lengar be teriid 
fro yow, for, Lady, this is al to gret a sorwe for to be bothe at yowr sonys dethe and 
at yowr deth and not deyin wyth yow but levyn stille alone and no comfort han 
wyth me." Than owr gracyows Lady answeryd to hir sowle, behestyng hir to prey for 
hir to hir sone, and seyd, "Dowtyr, alle thes sorwys that thu hast had for me and for my 
blissyd sone schal turne the to gret joye and blys in hevyn wythowtyn ende. And 
dowt the not, dowtyr, that thu schalt comyn to us ryth wel and be ryth wolcome whan 
thu comyst. But thu mayst not comyn yet, for thu schalt comyn in ryth good tyme. And, 
dowtyr, wete thu wel thu schalt fyndyn me a very modyr to the to helpyn the and socowr 
the as a modyr owyth to don hir dowtyr and purchasyn to the grace and vertu. And the 
same pardon that was grawntyd the befor tyme, it was confermyd on Seynt Nicholas
Day, that is to seyn plenowr remissyon, and it is not only grawntyd to the but also to 
alle tho that belevyn and to alle tho that schul belevyn into the worldys ende that God 
lovyth the and schal thankyn God for the. Yyf thei wyl forsakyn her synne and ben in 
ful wylle no more to turnyn ageyn therto but ben sory and hevy for that thei have do 
and wil don dew penawnce therfor, thei schal have the same pardon that is grawntyd to 
thiselfe, and that is alle the pardon that is in Jerusalem as was grawntyd the whan thu 
wer at Rafnys," as is beforn wretyn.