text4-75

4206 4207 4208 4209 4210 4211 4212 4213 4214 4215 4216 4217 4218 4219 4220 4221 4222 4223 4224 4225 4226 4227 4228 4229 4230 4231 4232 4233 4234 4235 4236 4237 4238		75 As the sayd creatur was in a chirch of Seynt Margaret to sey hir devocyons, ther cam a man knelyng at hir bak, wryngyng hys handys and schewyng tokenys of gret hevynes. Sche, parceyvyng hys hevynes, askyd what hym eylyd. He seyd it stod ryth hard wyth hym, for hys wyfe was newly delyveryd of a childe and sche was owt hir mende. "And, dame," he seyth, "sche knowyth not me ne non of hir neyborwys. Sche roryth and cryith so that sche makith folk evyl afeerd. Sche wyl bothe smytyn and bityn, and therfor is sche manykyld on hir wristys." Than askyd sche the man yyf he wolde that sche went wyth hym and sawe hir, and he seyd, "Ya, dame, for Goddys lofe." So sche went forth wyth hym to se the woman. And, whan sche cam into the hows, as sone as the seke woman that was alienyd of hir witte saw hir, sche spak to hir sadly and goodly and seyd sche was ryth wolcome to hir. And sche was ryth glad of hir comyng and gretly comfortyd be hir presens, "For ye arn," sche seyd, "a ryth good woman, and I behelde many fayr awngelys abowte yow, and therfor, I pray yow, goth not fro me, for I am gretly comfortyd be yow." And, whan other folke cam to hir, sche cryid and gapyd as sche wolde an etyn hem and seyd that sche saw many develys abowtyn hem. Sche wolde not suffyrn hem to towchyn hir be hyr good wyl. Sche roryd and cryid so bothe nyth and day for the most part that men wolde not suffyr hir to dwellyn amongys hem, sche was so tediows to hem. Than was sche had to the forthest ende of the town into a chambyr that the pepil schulde not heryn hir cryin. And ther was sche bowndyn handys and feet wyth chenys of yron that sche schulde smytyn nobody. And the sayd creatur went to hir iche day onys er twyis at the lest wey, and, whyl sche was wyth hir, sche was meke anow and herd hir spekyn and dalyin wyth good wil wythowtyn any roryng er crying. And the sayd creatur preyid for this woman every day that God schulde, yyf it were hys wille, restoryn hir to hir wittys ageyn. And owr Lord answeryd in hir sowle and seyd, "Sche schulde faryn ryth wel." Than was sche mor bolde to preyin for hir recuryng than sche was beforn, and iche day, wepyng and sorwyng, preyid for hir recur tyl God gaf hir hir witte and hir mende agen. And than was sche browt to chirche and purifiid as other women be, blyssed mote God ben. It was, as hem thowt that knewyn it, a ryth gret myrakyl, for he that wrot this boke had nevyr befor that tyme sey man ne woman, as hym thowt, so fer owt of hirself as this woman was ne so evyl to rewlyn ne to governyn, and sithyn he sey hir sad and sobyr anow, worschip and preysyng be to owr Lord wythowtyn ende for hys hy mercy and hys goodnes that evyr helpith at nede.