4292 
4293 
4294 
4295 
4296 
4297
4298 
4299
4300 
4301 
4302 
4303 
4304 
4305 
4306
4307 
4308 
4309 
4310
4311 
4312
4313
4314
4315
4316 
4317 
4318
4319 
4320 
4321 
4322
4323 
4324 
4325 
4326 
4327 
4328 
4329
4330 
4331 
4332 
4333 
4334 
4335 
4336 
4337 
4338 
4339 
4340
4341 
4342 
4343 
4344 
4345 
4346 
4347 
4348 
4349 
4350 
4351
4352
4353 
4354 
4355 
4356
4357 
4358 
4359
4360 
4361 
4362 
4363
4364
4365
4366 
4367 

N
 
 
 
 
 
 
 
 
 
 
 
 
 
 

Whan the seyd creatur had first hyr wondirful cryis and on a tyme was in gostly 
dalyawns wyth hir sovereyn Lord Crist Jhesu, sche seyd, "Lord, why wilt thu gyf me 
swech crying that the pepil wondryth on me therfor and thei seyn that I am in gret 
perel, for, as thei seyn, I am cawse that many men synne on me. And thu knowist, 
Lord, that I wolde gevyn no man cawse ne occasyon of synne yyf I myth, for I had 
levar, Lord, ben in a preson of ten fadom depe ther to cryin and wepyn for my synne 
and for alle mennys synnys and specialy for thy lofe al my lyf tyme than I schulde gevyn 
the pepil occasyon to synnyn on me wilfully. Lord, the worlde may not suffyr me to 
do thy wil ne to folwyn aftyr thi steryng, and therfor I prey the, yyf it be thy wil, take 
thes cryingys fro me in the tyme of sermownys that I cry not at thin holy prechyng and 
late me havyn hem be myself alone so that I be not putt fro heryng of thin holy prechyng 
and of thin holy wordys, for grettar peyn may I not suffyr in this worlde than be put 
fro thi holy worde heryng. And, yyf I wer in preson, my most peyn schulde be the 
forberyng of thin holy wordys and of thin holy sermownys. And, good Lord, yyf thu 
wilt algate that I crye, I prey the geve me it alone in my chambyr as meche as evyr thu 
wilt and spar me amongys the pepil, yyf it plese the." Owr merciful Lord Crist Jhesu 
answeryng to hir mende seyd, "Dowtyr, prey not therfor; thu schalt not han thy desyr in 
this thow my modyr and alle the seyntys in hevyn preye for the, for I schal make the 
buxom to my wil that thu schalt criyn whan I wil, and wher I wil, bothyn lowde and 
stille, for I teld the, dowtyr, thu art myn and I am thyn, and so schalt thu be wythowtyn 
ende. Dowtyr, thu seist how the planetys ar buxom to my wil, that sumtyme ther cum 
gret thundirkrakkys and makyn the pepil ful sor afeerd. And sumtyme, dowtyr, thu 
seest how I sende gret levenys that brennyn chirchys and howsys. Also sumtyme thu 
seest that I sende gret wyndys that blowyn down stepelys, howsys, and trees owt of 
the erde and doth mech harm in many placys, and yet may not the wynd be seyn but it 
may wel be felt. And ryth so, dowtyr, I fare wyth the myth of my Godheed; it may not 
be seyn wyth mannys eye, and yyt it may wel be felt in a sympil sowle wher likyth to 
werkyn grace, as I do in thi sowle. And, as sodeynly as the levyn comith fro hevyn, so 
sodeynly come I into thy sowle, and illumyn it wyth the lyght of grace and of 
undirstandyng, and sett it al on fyr wyth lofe, and make the fyr of lofe to brenne therin 
and purgyn it ful clene fro alle erdly filth. And sumtyme, dowtyr, I make erdedenys 
for to feryn the pepil that thei schulde dredyn me. And so, dowtyr, gostly have I don 
wyth the and wyth other chosyn sowlys that schal ben savyd, for I turne the erthe of her 
hertys upsodown and make hem sore afeerd that thei dredyn venjawnce schulde fallyn 
on hem for her synnys. And so dedist thu, dowtyr, whan thu turnedist fyrst to me, and 
it is nedful that yong begynnarys do so, but now, dowtyr, thu hast gret cawse to lovyn 
me wel, for the parfyte charité that I gyf the puttyth away al drede fro the. And, thow 
other men settyn lityl be the, I sett but the mor prys be the. As sekyr as thu art of the 
sunne whan thu seest it schynyn bryghtly, ryth so sekyr art thu of the lofe of God at al 
tyme. Also, dowtyr, thu wost wel that I send sumtyme many gret reynys and scharp 
schowerys, and sumtyme but smale and softe dropis. And ryth so I far wyth the, dowtyr, 
whan it likyth me to spekyn in thi sowle; I gyf the sumtyme smale wepyngys and soft 
teerys for a tokyn that I lofe the, and sumtyme I geve the gret cryis and roryngys for to 
makyn the pepil aferd wyth the grace that I putte in the into a tokyn that I wil that my 
modrys sorwe be knowyn by the that men and women myth have the mor compassyon 
of hir sorwe that sche suffyrd for me. And the thryd tokyn is this, dowtyr, that what 
creatur wil takyn as mech sorwe for my passyon as thu hast don many a tyme and wil 
sesyn of her synnys that thei schal have the blys of hevyn wythowtyn ende. The ferth 
tokyn is this: that any creatur in erthe, haf he be nevyr so horrybyl a synner, he thar 
nevyr fallyn in dispeyr yyf he wyl takyn exampil of thy levyng and werkyn sumwhat 
theraftyr as he may do. Also, dowtyr, the fifte tokyn is that I wil thu knowe in thiself 
be the gret peyne that thu felist in thyn hert whan thu cryist so sor for my lofe that it schal 
be cawse thu schalt no peyn felyn whan thu art comyn owt of this worlde and also that 
thu schalt have the lesse peyn in thy deying, for thu hast so gret compassyon of my 
flesche I must nede have compassyon of thi flesch. And therfor, dowtyr, suffyr the 
pepil to sey what thei wil of thi crying, for thu art nothyng cawse of her synne. Dowtyr, 
the pepil synnyd on me, and yet was I not cawse of her synne." Than sche seyd, "A, 
Lord, blissyd mote thu be, for me thynkyth thu dost thiself al that thu biddist me don. 
In Holy Writte, Lord, thu byddyst me lovyn myn enmys, and I wot wel that in al this 
werld was nevyr so gret an enmye to me as I have ben to the. Therfor, Lord, thei I wer 
slayn an hundryd sithys on a day, yyf it wer possibyl, for thy love, yet cowde I nevyr 
yeldyn the the goodnes that thu hast schewyd to me." Than answeryd owr Lord to hir 
and seyd, "I prey the, dowtyr, geve me not ellys but lofe. Thu maist nevyr plesyn me 
bettyr than havyn me evyr in thi lofe, ne thu schalt nevyr in no penawns that thu mayst 
do in erth plesyn me so meche as for to lovyn me. And, dowtyr, yyf thu wilt ben hey 
in hevyn wyth me, kepe me alwey in thi mende as meche as thu mayst and forgete me 
not at thi mete, but thynk alwey that I sitte in thin hert and knowe every thowt that is 
therin, bothe good and ylle, and that I parceyve the lest thynkyng and twynkelyng of 
thyn eye." Sche seyd agen to owr Lord, "Now trewly, Lord, I wolde I cowde lovyn 
the as mych as thu mythist makyn me to lovyn the. Yyf it wer possibyl, I wolde lovyn 
the as wel as alle the seyntys in hevyn lovyn the and as wel as alle the creaturys in erth 
myth lovyn the. And I wolde, Lord, for thi lofe be leyd nakyd on an hyrdil, alle men to 
wonderyn on me for thi love, so it wer no perel to her sowlys, and thei to castyn slory 
and slugge on me, and be drawyn fro town to town every day my lyfetyme, yyf thu 
wer plesyd therby and no mannys sowle hyndryd, thi wil mote be fulfillyd and not 
myn."