text4-78

4368 4369 4370 4371 4372 4373 4374 4375 4376 4377 4378 4379 4380 4381 4382 4383 4384 4385 4386 4387 4388 4389 4390 4391 4392 4393 4394 4395 4396 4397 4398 4399 4400 4401 4402 4403 4404 4405 4406 4407 4408 4409 4410 4411 4412 4413 4414 4415 4416 4417 4418 4419 4420 4421 4422 4423 4424 4425 4426 4427 4428 4429 4430 4431 4432 4433 4434 4435 4436 4437 4438 4439 4440		78 Many yerys on Palme Sonday, as this creatur was at the processyon wyth other good pepyl in the chirch yerd and beheld how the preystys dedyn her observawnce, how thei knelyd to the sacrament and the pepil also, it semyd to hir gostly sygth as thei sche had ben that tyme in Jerusalem and seen owr Lord in hys manhod receyvyd of the pepil as he was whil he went her in erth. Than had sche so meche swetnes and devocyon that sche myth not beryn it, but cryid, wept, and sobbyd ful boistowsly. Sche had many an holy thowt of owr Lordys passyon and beheld hym in hir gostly syght as verily as he had ben aforn hir in hir bodily syght. Therfor myth sche not wythstondyn wepyng and sobbyng, but sche must nedys wepyn, cryin, and sobbyn whan sche beheld hir Savyowr suffyr so gret peynys for hir lofe. Than schulde sche preyn for al the pepil that was levyng in erth that thei myth do owr Lord dew worschep and reverens that tymys and al tymys and that thei myth ben worthy to heryn and undirstondyn the holy wordys and lawys of God and mekely obeyn and trewly fulfillyn hem upon her powyr. And it was custom in the place ther sche was dwellyng to have a sermown on that day, and than, as a worschepful doctowr of divinité was in the pulpit and seyd the sermown, he rehersyd oftyntyme thes wordys, "Owr Lord Jhesu langurith for lofe." Tho wordys wrowt so in hir mende whan sche herd spekyn of the parfyte lof that owr Lord Jhesu Crist had to mankynde and how der he bowt us wyth hys bittyr Passyon, schedyng hys hert blood for owr redempcyon, and suffyrd so schamful a deth for owr salvacyon, than sche myth no lengar kepyn the fir of lofe clos wythinne hir brest, but, whethyr sche wolde er not, it wolde aperyn wythowteforth swech as was closyd wythinneforth. And so sche cryed ful lowde and wept and sobbyd ful sor as thow sche schulde a brostyn for pité and compassyon that sche had of owr Lordys passyon. And sumtyme sche was al on a watyr wyth the labowr of the crying, it was so lowde and so boistows, and mech pepil wondryd on hir and bannyd hir ful fast, supposyng that sche had feynyd hirself for to cryin. And sone aftyr owr Lord seyd onto hir, "Dowtyr, this plesith me rith wel, for the mor schame and mor despite that thu hast for my lofe, the mor joy schalt thu have wyth me in hevyn, and it is rithful that it be so." Sumtyme sche herd gret sowndys and gret melodiis wyth hir bodily erys, and than sche thowt it was ful mery in hevyn and had ful gret languryng and ful gret longyng thedyrward wyth many a stille mornyng. And than many tymys owr Lord Jhesu Crist wolde sey to hir, "Dowtyr, her is this day a fayr pepil, and many of hem schal ben ded er this day twelmonyth," and telde hir beforn whan pestilens schulde fallyn. And sche fonde it in dede as sche had felt beforn, and that strengthyd hir mech in the lofe of God. Owr Lord wolde seyn also, "Dowtyr, thei that wil not belevyn the goodnes and the grace that I schewe onto the in this lyfe, I schal make hem to knowe the trewth whan thei arn dede and owt of this world. Dowtyr, thu hast a good zele of charité in that thu woldist alle men wer savyd, and so wolde I. And thei seyn that so wolde thei, but thu maist wel se that thei wol not hemself be savyd, for alle thei wil sumtyme heryn the word of God, but thei wil not alwey don theraftyr, and thei wil not sorwyn hemself for her synnys, ne thei wil suffyr non other to suffir for hem. Nevyrthelesse, dowtyr, I have ordeynd the to be a merowr amongys hem for to han gret sorwe that thei schulde takyn exampil by the for to have sum litil sorwe in her hertys for her synnys that thei myth therthorw be savyd, but thei lovyn not to heryn of sorwe ne of contricyon. But, good dowtyr, do thu thi dever and prey for hem whil thu art in this world, and thu schalt have the same mede and reward in hevyn as yyf al the werlde wer savyd be thi good wil and thi preyer. Dowtyr, I have many tymys seyd to the that many thowsand sowlys schal be savyd thorw thi preyerys, and sum that lyn in poynt of deth schal han grace thorw thi meritys and thi preyerys, for thi terys and thi preyerys arn ful swet and acceptabil unto me." Than sche seyd in hir mende to owr Lord Jhesu Crist, "A, Jhesu, blissyd mote thu be wythowtyn ende, for I have many a gret cawse to thank the and lofe the wyth al myn hert, for it semith to me, Lord, that thu art alle charité to the profyte and helth of mannys sowle. A, Lord, I beleve that he schal be ryth wikke that schal be partyd fro the wythowtyn ende. He schal neithyr welyn good, ne do good, ne desiryn good. And therfor, Lord, I thanke the for al goodnes that thu hast schewyd onto me, ryth unworthy wrech." And than on the same Sonday, whan the preyste toke the crossestaf and smet on the chirche dor and the dor openyd ageyn hym, and than the preyst entryd wyth the sacrament and al the pepil folwyng into chirche, than thowt sche that owr Lord spak to the devyl and openyd helle gatys confowndyng hym and alle hys oste and what grace and goodnes he schewyd to tho sowlys, delyveryng hem fro evyrlestyng preson, mawgre the devyl and alle hys. Sche had many an holy thowt and many an holy desyr whech sche cowde nevyr tellyn ne rehersyn ne hir tunge myth nevyr expressyn the habundawnce of grace that sche felt, blissyd be owr Lord of alle hys gyftys. Whan thei wer comyn into the cherch and sche beheld the preystys knelyng beforn the crucifixe, and, as thei songyn, the preyste whech executyd the servyse that day drow up a cloth befor the crucyfixe thre tymys, every tyme heyar than other, that the pepil schulde se the crucifixe, than was hir mende al holy takyn owt of al erdly thyngys and set al in gostly thyngys, preying and desyryng that sche myth at the last han the ful syght of hym in hevyn whech is bothin God and man in oo persone. And than schulde sche al the messe tyme aftyr wepyn and sobbyn ful plentyuowsly, and sumtyme among cryin rith fervently, for hir thowt that sche saw owr Lord Crist Jhesu as verily in hir sowle wyth hir gostly eye as sche had seyn beforn the crucifixe wyth hir bodily eye.