458 
459 
460 
461
462 
463
464 
465 
466
467 
468 
469
470
471
472 
473

N
 
 
 
 
 
 
 
 
 

   Another tyme, as this creatur lay in hir prayer, the Modyr of Mercy, aperyng to hir,
seyd, "A, dowtyr, blyssyd may thow be, thi sete is mad in hevyn befor my sonys kne
and whom thow wylt han wyth the." Than askyd hyr blyssed sone, "Dowtyr, whom
wylt thow han felaw wyth the?" "My derworthy Lord, I aske my gostly fadyr Maystyr
N." "Why askyst mor hym than thyn owyn fadyr er thin husbond?" "For I may nevyr
qwyte hym the goodnesse that he hath don to me and the gracyows labowrys that he
hath had abowt me in heryng of my confessyon." "I grawnt the thi desyr of hym, and
yet schal thi fadyr ben savyd, and thi husbond also, and alle thi chylderyn." Than this
creatur seyd, "Lord, sythen thow hast forgovyn me my synne, I make the myn execu-
tor of alle the god werkys that thow werkyst in me. In prayng, in thynkyng, in wepyng,
in pylgrimage goyng, in fastyng, er in any good word spekyng, it is fully my wyl that
thow geve Maystyr N halfyndel to encres of hys meryte as yf he dede hem hys owyn
self. And the other halvendel, Lord, sprede on thi frendys and thi enmys and on my
frendys and myn enmys, for I wyl have but thiself for my mede." "Dowtyr, I schal be
a trew executor to the and fulfyllyn all thi wylle, and for thi gret charyté that thow hast
to comfortyn thin even cristen thu schalt have dubbyl reward in hevyn."