474 
475 
476
477
478
479
480
481 
482
483
484 
485
486
487
488 
489
490
491
492 
493 
494
495
496 
497 
498
499 
500 
501 
502 
503
504

N
 
 
 
 
 
 
 
 
 
 
 
 
 
 
 

N
 

   Another tyme, as this creatur prayd to God that sche myt levyn chast be leve of hir
husbond, Cryst seyd to hir mende, "Thow must fastyn the Fryday bothen fro mete and
drynke, and thow schalt have thi desyr er Whitsonday, for I schal sodeynly sle thin
husbonde." Than on the Wednysday in Estern woke, aftyr hyr husbond wold have had
knowlach of hir as he was wone befor, and whan he gan neygh hir, sche seyd, "Jhesus,
help me," and he had no power to towche hir at that tyme in that wyse, ne nevyr aftyr
wyth no fleschly knowyng. It befel on a Fryday befor Whytson Evyn, as this creatur
was in a cherch of Seynt Margarete at N heryng hir messe, sche herd a gret noyse and
a dredful. Sche was sore astoyned, sor dredyng the voys of the pepyl, whech seyd God
schuld take venjawns upon hir. Sche knelyd upon hir kneys, heldyng down hir hed
and hir boke in hir hand, prayng owyr Lord Crist Jhesu for grace and for mercy.
Sodeynly fel down fro the heyest party of the cherch vowte fro undyr the fote of the
sparre on hir hed and on hir bakke a ston whech weyd three pownd and a schort ende
of a tre weyng six pownd that hir thowt hir bakke brakke asundyr, and sche ferd as
sche had be deed a lytyl whyle. Soone aftyr sche cryed, "Jhesu mercy," and anoon hir
peyn was gon. A good man whech hygth John of Wyreham, seyng this wondyr cas
and supposyng that sche ben gretly dysesyd, cam and pullyd hir be the sleve and seyd
"Dame, how far ye?" The creatur al hol and sownd thankyd hym of hys cher and hys
charyté, mech merveylyng and gretly awonderyd that sche felt no peyn and had felt so
mech a lytyl befor. Ne twelve wekys aftyr sche felt no peyne. Than the spiryt of God
seyd to hir sowle, "Helde this for a gret myracle, and, yyf the pepyl wyl not levyn this,
I schal werkyn meche mor." A worschepful doctowr of dyvynité wych hygth Maystyr
Aleyn, a Whyte Frer, heryng of this wondyrful werk, inqwired of this creature alle the
forme of this processe. He, desyryng the werk of God to be magnyfyed, gat hym the
same ston that fel upon hir bakke and way it, and sythen he gat hym the treys ende that
fel upon hir hed whech oon of the kepars of the cherch had leyd in the fyre to bren it.
And this worshepful doctowr seyd it was a gret myracle and ower Lord was heyly to
be magnyfied for the preservyng of this creatur agen the malyce of hir enmy, and teld
it mech pepyl, and mych pepyl magnyfied mech God in this creatur. And also mech
pepyl wold not levyn it, but rathyr levyd it was a tokyn of wreth and venjawns than
thei wold levyn it was any token of mercy er quemfulnes.