1078 
1079
1080
1081
1082
1083
1084 
1085
1086
1087
1088
1089 
1090 
1091 
1092 
1093 
1094 
1095 
1096 
1097
1098
1099 
1100
1101
1102 
1103
1104 
1105 
1106

N
 
 
 
 
 
 
 
 
 
 
 
 

N
N
N
 
 
 
 
 
 
 
 
 
 

   On a day as this creatur was heryng hir messe, a yong man and a good prest heldyng
up the sacrament in hys handys ovyr hys hed, the sacrament schok and flekeryd to and
fro as a dowe flekeryth wyth hir wengys. And, whan he held up the chalys wyth the
precyows sacrament, the chalys mevyd to and fro as it schuld a fallyn owt of hys
handys. Whan the sacre was don, this creatur had gret merveyle of the steryng and
mevyng of the blyssed sacrament, desyring to se mor sacreys and lokyng yf it wold
don so agen. Than seyd owyr Lord Jhesu Crist to the creatur, "Thow schalt no mor sen
it in this maner, therfor thank God that thow hast seyn. My dowtyr, Bryde, say me
nevyr in this wyse." Than seyd this creatur in hir thowt, "Lord, what betokenyth this?"
"It betokenyth venjawnce." "A, good Lord, what venjawnce?" Than seyd owyr Lord
agen to hir, "Ther schal be an erdene, tel it whom thow wylt in the name of Jhesu. For
I telle the forsothe rygth as I spak to Seynt Bryde ryte so I speke to the, dowtyr, and I
telle the trewly it is trewe every word that is wretyn in Brides boke, and be the it schal
be knowyn for very trewth. And thow schalt faryn wel, dowtyr, in spyte of alle thyn
enmys; the mor envye thei han to the for my grace, the bettyr schal I lofe the. I wer not
rygthful God but I prevyd the, for I knowe the bettyr than thow dost thiself, what that
evyr men seyn of the. Thow seyst I have gret paciens in the syn of the pepyl, and thow
seyst soth, but, yf thow sey the synne of the pepyl as I do, thow schuldyst have mech
more mervayle in my pacyens and mech mor sorwe in the synne of the pepyl than
thow hast." Than the creatur seyd, "Alas, derworthy Lord, what schal I do for the
pepyl?" Owyr Lord answeryd, "It is inow to the to don as thow dost." Than sche
preyed, "Mercyful Lord Crist Jhesu, in the is al mercy and grace and goodnes. Have
mercy, pyté, and compassyon of hem. Schew thi mercy and thy goodnes upon hem, help
hem, send hem very contricyon, and late hem nevyr deyn in her synne." Owyr mercyful
Lord seyde, "I may no mor, dowtyr, of my rytfulnesse do for hem than I do. I send
hem prechyng and techyng, pestylens and bataylys, hungyr and famynyng, losse of
her goodys wyth gret sekenesse, and many other tribulacyons, and thei wyl not levyn
my wordys ne thei wyl not knowe my vysitacyon. And therfor I schal sey to hem that
I made my servawntys to prey for yow and ye despysed her werkys and her levyng."