1206
1207
1208
1209 
1210 
1211 
1212 
1213
1214 
1215
1216 
1217
1218
1219 
1220 
1221 
1222 
1223 
1224 
1225 
1226 
1227 
1228 
1229
1230
1231
1232 
1233 
1234
1235
1236 
1237 
1238 
1239 
1240
1241 
1242
1243 
1244
1245 
1246
1247
1248 
1249
1250 
1251
1252

N
 
 

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

   Ther cam onys a vykary to this creatur, preyng hir to prey for hym and wetyn
whedyr he schuld mor plese God to levyn hys cure and hys benefyce or to kepe it
stylle, for hym thowt he profyted not among hys parysshonys. The creatur beyng in 
hir preyers havyng mende of this mater, Crist seyde unto hir spyrite, "Bydde the vykary
kepyn stylle hys cure and hys benefyce and don hys diligence in prechyng and techyng
of hem hys owyn persone and sumtyme procuryn other to teche hem my lawys and
my comawndmentys so that ther be no defawte in hys parte, and, yyf thei do nevyr the
bettyr, hys mede schal nevyr be the lesse." And so sche dede hir massage as sche was
comawndyd, and the vykary kept stylle hys cur.
    As this creatur was in a cherch of Seynt Margarete in the qwer wher a cors was
present, and he that was husbond of the same cors whyl sche levyd was ther in good
hele for to offeryn hir messe peny aftyr the custom of the place, owyr Lord seyd to the
forseyd creatur, "Lo, dowtyr the sowle of this cors is in purgatory, and he that was hir
husbond is now in good hele, and yet he schal ben ded in schort tyme." And so it befel
as sche felt be revelacyon. Also, as this creatur lay in the qwer in hir preyers, a prest
cam to hir and preyde hir to prey for a woman whech lay in poynt of deth. As this creatur
gan to prey for hir, owyr Lord seyd to hir, "Dowtyr, it is gret nede to prey for hir, for
sche hath ben a wykkyd woman and sche schal be ded." And sche seyd agen "Lord, as
thu lovyst me, save hir sowle fro dampnacyon," and than sche wept wyth plentyuows
teerys for that sowle. And owyr Lord grawntyd hir mercy for the sowle, comawndyng
hir to prey for hir. Thys creaturys gostly fadyr cam to hir, mevyng hir to prey for a
woman whech lay in poynt of deth to mannys sygthe. And anon owyr Lord seyd sche
schuld levyn and faryn wel, and so sche dede. A good man whech was a gret frend to
this creatur and an helply to the powyr pepyl was strongly seke many wekys togedyr.
And mech mone was mad for hym, for men wend he schuld nevyr a levyd, hys peyn
was so wondyrful in alle hys joyntys and in al hys body. Owyr Lord Jhesu seyd to hir
spirite, "Dowtyr, be not abaschyd for this man, he schal levyn and faryn rygth wel."
And so he levyd many yerys aftyr in good helth and prosperité. Another good man
whech was a lyster lay seke also, and, whan this creature preyd for hym, it was answeryd
to hir mende that he schulde languryn a whyle and sythen he schuld ben ded wyth that
same sekenesse. And so he was in schort tyme aftyr. Also a worshepful woman and,
as men levyd, an holy woman wech was a specyal frende to this creatur was ryte seke,
and mech pepyl wend sche schuld a be ded. Than, this creatur preyng for hyr, owyr
Lord seyd, "Sche schal not deyn this ten yer for ye schal aftyr this makyn ful mery
togedyr and han ful good comunycacyon as ye han had befor." And so it was in trewth;
this holy woman levyd many yerys aftyr. Many mo swech revelacyons this creatur
had in felyng; hem alle for to wryten it schuld be lettyng peraventur of mor profyte.
Thes be wretyn for to schewyn the homlynes and the goodlynes of owyr mercyful
Lord Crist Jhesu and for no commendacyon of the creatur. Thes felyngys and swech
other many mo than be wretyn, bothe of levyng and of deyng, of summe to be savyd,
of summe to be dammyd, weryn to this creatur gret peyn and ponyschyng. Sche had
levar a sufferyd any bodyly penawns than thes felyngys and sche mygth a put hem
awey for the dred that sche had of illusyons and deceytys of hir gostly enmys. Sche
had sumtyme so gret trubbyl wyth swech felyngys whan it fel not trewe to hir
undyrstandyng, that hir confessowr feryd that sche schuld a fallyn in dyspeyr therwyth.
And than aftyr hir turbele and hir gret fere it schuld ben schewyd unto hir sowle how
the felyngys schuld ben undyrstondyn.