2389
2390 
2391 
2392
2393 
2394
2395
2396
2397 
2398 
2399 
2400 
2401
2402 
2403 
2404 
2405 
2406 
2407 
2408
2409 
2410 
2411 
2412
2413 
2414 
2415 
2416 
2417 
2418
2419
2420 
2421 
2422
2423 
2424 
2425 
2426 
2427
2428
2429 
2430 
2431 
2432

On the next day betymes come to this creatur the good preste, whech was as hir 
sone, and seyd, "Modyr, good tydyngys. We have good wynd, thankyd be God." And 
anon sche gaf preysyng to owr Lord and preyd hym of hys mercy to grawntyn hem 
good perseverawns of wynde and wederyng that thei myth come hom in safté. And it 
was answeryd and comawndyd in hir sowle that thei schuld gon her wey in the name of 
Jhesu. Whan the preste knew that sche wolde algatys gon forth, he seyd, "Modyr, her 
is no schip; her is but a lityl hecke." Sche answeryd ageyn, "Sone, God is as mythy in 
a lityl schip as in a gret schip, for I wyl go therin be the leve of God." And, whan thei 
wer in the lityl schip, it began to waxin gret tempestys and dyrke wedyr. Than thei 
cryed to God for grace and mercy, and anon the tempestys sesyd, and thei had fayr 
wedyr and seyled al the nygth on ende and the next day tyl evynsong tyme, and than thei 
cam to londe. And, whan thei wer on the londe, the forseyd creatur fel downe on hir 
knes kyssyng the grownde, hyly thankyng God that had browt hem hom in safté. 
Than had this creatur neithyr peny ne halfpeny in hir purse. And so thei happyd to 
meten wyth other pilgrimys whech govyn hir three halfpenys, inasmeche as sche had 
in comownyng telde hem good talys. And than was sche rygth glad and mery, for sche 
had sum good that sche myght offeryn in the worshep of the Trinité whan sche come 
to Norwych as sche dede whan sche went owt of Inglondward. And so, whan sche 
cam ther, sche offeryd wyth rygth good wylle and sithyn went sche wyth hir felaschep 
to the vykary of Seynt Stevenys, Maistyr Richard Castyr, whech levyd that tyme. And 
he led hem wyth hym to the place ther he went to boorde and mad hem ryth good cher. 
And he seyd to the forseyd creatur, "Margery, I merveyl how ye can be so mery and 
han had so gret labowr and ben so fer hens." "Syr, for I have gret cawse to ben mery 
and joyn in owr Lorde that hath holpyn me and socowryd me and browt me ageyn in 
safté, blyssed and worshepyd mot he be." And so thei dalyed in owr Lord a good 
while and had ful goodly cher. And than thei tokyn her leve, and sche went to an 
ankyr whech was a monke of a fer cuntré and dwellyd in the chapel of the felde. He 
bar a name of gret perfeccyon and befortyme had lovyd this creatur ryth meche. And 
sithyn thorw evyl langage that he herd of hir he turnyd al agens hir. And therfor sche 
went to hym in purpose to mekyn hyrselfe and drawyn hym to charité yyf sche myth. 
Whan sche was come to hym, he wolcomyd hir hom schortly and askyd wher sche 
had don hir chylde the whech was begotyn and born whil sche was owte, as he had 
herd seyde. And sche seyd, "Ser, the same childe that God hath sent me I have browt 
hom, for God knowyth I dede nevyr sithyn I went owte wherthorw I schulde have a 
childe." And wolde he not levyn hir for nowt that sche cowde sey. And nevyrthelesse 
yet sche lowly and mekely schewyd hym for trust that sche had in hym how it was 
owr Lordys wyl that sche schulde be clad in white clothyng. And he seyd "God forbede 
it," for sche schulde than make al the world to wondyr on hir. And sche seyd agen, "Ser, 
I make no fors so that God be plesyd therwyth." Than he bad hir comyn agen to hym 
and be governyd be hym and be a good preste hite Ser Edwarde. And sche seyd sche 
schulde wete first yyf it wer the wil of God er not, and therwyth sche toke hir leve at 
that tyme. And, as sche went fro hymward be the wey, owr Lord seyde to hir sowle, "I 
wil not that thu be governyd be hym." And sche sent hym worde what answer sche 
had of God.