3238 
3239
3240
3241
3242 
3243 
3244 
3245 
3246 
3247
3248 
3249 
3250 
3251 
3252 
3253 
3254 
3255 
3256
3257 
3258 
3259 
3260 
3261 
3262
3263
3264 
3265 
3266 
3267 
3268 
3269
3270 
3271 
3272 
3273 
3274 
3275 
3276
3277 
3278 
3279 
3280 
3281

N
 
 
 

Afftyrward God ponyschyd hir wyth many gret and divers sekenes. Sche had the 
flyx a long tyme tyl sche was anoyntyd, wenyng to a be deed. Sche was so febyl that 
sche myth not heldyn a spon in hir hand. Than owr Lord Jhesu Crist spak to hir in hir 
sowle and seyd that sche schulde not dey yet. Than sche recuryd agen a lytyl while. And 
anon aftyr sche had a gret sekenes in hir hevyd and sithyn in hir bakke that sche feryd 
to a lost hir witte therthorw. Aftyrwarde, whan sche was recuryd of alle thes sekenessys, 
in schort tyme folwyd an other sekenes whech was sett in hir ryth syde, duryng the 
terme of eight yer, saf eight wokys, be divers tymes. Sumtyme sche had it onys in a 
weke contunyng sumtyme thirty owrys, sumtyme twenty, sumtyme ten, sumtyme eight, 
sumtyme four, and sumtyme two, so hard and so scharp that sche must voydyn that 
was in hir stomak as bittyr as it had ben galle, neythyr etyng ne drynkyng whil the 
sekenes enduryd but evyr gronyng tyl it was gon. Than wolde sche sey to owr Lorde, 
blysful Lord, why woldist thu becomyn man and suffyr so meche peyne for my 
synnes and for alle mennys synnes that schal be savyd, and we arn so unkende, Lord, to 
the, and I, most unworthy, can not suffyr this lityl peyne? A, Lord, for thy gret peyn 
have mercy on my lityl peyne; for the gret peyne that thu suffredyst gef me not so 
meche as I am worthy, for I may not beryn so meche as I am worthy. And, yyf thu 
wilte, Lord, that I ber it, sende me pacyens, for ellys I may not suffyr it. A, blisful 
Lord, I had levyr suffyr alle the schrewyd wordys that men myth seyn of me and alle
clerkys to prechyn agens me for thy lofe, so it were no hyndryng to no mannys sowle, 
than this peyne that I have. For schrewyd wordys to suffyr for thi lofe it hirte me ryth 
nowt, Lord, and the werlde may takyn no thyng fro me but worschep and worldly 
good, and be the worschip of the werlde I sett ryth nowt. And alle maner of goodys 
and worschepys and alle maner of lovys in erthe, I prey the, Lord, forbede me, namely 
alle tho lovys and goodys of any erdly thyng whech schulde discres my lofe agens the, 
er lesse my meryte in hevyn; and alle maner of lovys and goodys whech thu knowist 
in thy Godheed schulde encresyn my love to the, I prey the, grawnt me for thy mercy to 
thin evyrlestyng worschep." Sumtyme, notwythstondyng the sayd creatur had gret 
bodily sekenes, yet the Passyon of owr merciful Lord Crist Jhesu wrowt so in hir 
sowle that for the tyme sche felt not hir owyn sekenes but wept and sobbyd in the 
mend of owr Lordys Passyon as thow sche seyn hym wyth hir bodily eye sufferyng 
peyne and passyon beforn hir. Sithyn, whan eight yer wer passyd, hir sekenes scapyd 
that it cam not weke be weke as it dede beforn, but than encresyd hir cryes and hir 
wepyngys in so meche that prestys durst not howselyn hir opynly in the chirche but 
prevyly in the priowrys chapel at Lenne fro the peplys audiens. And in that chapel 
sche had so hy contemplacyon and so meche dalyawns of owr Lord, inasmeche as 
sche was putte owt of chirche for hys lofe, that sche cryed what tyme sche schulde ben 
howselyd as yyf hir sowle and hir body schulde a partyd asundyr, so that tweyn men 
heldyn hir in her armys tyl hir cryng was cesyd, for sche myth not beryn the habundawns 
of lofe that sche felt in the precyows sacrament, whech sche stedfastly belevyd was 
very God and man in the forme of breed. Than owr blisful Lord seyde unto hir mende, 
"Dowtyr, I wil not han my grace hyd that I geve the, for the mor besy that the pepil is 
to hyndryn it and lette it, the mor schal I spredyn it abrood and makyn it knowyn to 
alle the worlde."