4080 
4081 
4082 
4083
4084
4085 
4086 
4087 
4088 
4089 
4090 
4091
4092 
4093
4094 
4095
4096 
4097 
4098 
4099 
4100 
4101 
4102
4103 
4104
4105
4106 
4107
4108 
4109 
4110 
4111 
4112
4113 
4114 
4115 
4116 
4117
4118 
4119 
4120 
4121 
4122 
4123 
4124
4125 
4126
4127

N
 

N

N
 
 
 

N
N
 
 
 
 
 

N
 
 

N
 
 
 
 
 

So be processe of tyme hir mende and hir thowt was so joynyd to God that sche 
nevyr forgate hym but contynualy had mende of hym and behelde hym in alle creaturys. 
And evyr the mor that sche encresyd in lofe and in devocyon, the mor sche encresyd 
in sorwe and in contrycyon, in lownes, in mekenes, and in the holy dreed of owr Lord, 
and in knowlach of hir owyn frelté, that, yyf sche sey a creatur be ponischyd er scharply 
chastisyd, sche schulde thynkyn that sche had ben mor worthy to ben chastisyd than that 
creatur was for hir unkyndnes ageyns God. Than schulde sche cryen, wepyn, and sobbyn 
for hir owyn synne and for the compassyon of the creatur that sche sey so ben ponyschyd 
and scharply chastisyd. Yyf sche sey a prince, a prelat, er a worthy man of state and 
degré whom men worschepyd and reverensyd wyth lownes and mekenes, anon hir 
mende was refreschyd into owr Lord, thynkyng what joy, what blysse, what worschep 
and reverens he had in hevyn amongys hys blyssyd seyntys, syn a deedly man had so 
gret worschep in erth. And most of alle whan sche sey the precyows sacrament born 
abowte the town wyth lyte and reverens, the pepil knelyng on her kneys, than had 
sche many holy thowtys and meditacyonys, and than oftyntymys schulde sche cryin and 
roryn as thow sche schulde a brostyn for the feyth and the trost that sche had in the 
precyows sacrament. Also the sayd creatur was desiryd of mech pepil to be wyth hem 
at her deying and to prey for hem, for, thow thei lovyd not hir wepyng ne hir crying in 
her lyfe tyme, thei desiryd that sche schulde bothyn wepyn and cryin whan thei schulde 
deyin, and so sche dede. Whan sche sey folke be anoyntyd, sche had many holy thowtys, 
many holy meditacyons, and, yyf sche saw hem deyin, hir thowt sche saw owr Lord 
deyin and sumtyme owr Lady, as owr God wolde illumyn hir gostly syth of 
undirstondyng. Than schulde sche cryin, wepyn, and sobbyn ful wondirfully as sche 
had beheldyn owr Lord in hys deying er owr Lady in hir deying. And sche thowt in hir 
mende that God toke many owt of this worlde whech wolde a levyd ful fawyn, "And I, 
Lord," thowt sche, "wolde ful fawyn comyn to the, and aftyr me thu hast no yernyng," 
and swech thowtys encresyd hir wepyng and hir sobbyng. On a tyme a worschepful 
lady sent for hir for cawse of comownyng, and, as thei weryn in her comunycacyon, 
the lady gaf to hir a maner of worschip and preysyng, and it was to hir gret peyne to 
have any preysyng. Nevyrthelesse anoon sche offryd it up to owr Lord, for sche desyrid 
no preysyng but hys only, wyth a gret cry and many devowt terys. So ther was neithyr 
worschep ne preysyng, lofe ne lakkyng, schame ne despite that myth drawyn hir lofe 
fro God, but, aftyr the sentens of Seynt Powle, "To hem that lovyn God al thyng 
turnyth into goodnes," so it ferd wyth hir. What that evyr sche sey er herd, alwey hir 
lofe and hir gostly affeccyon encresyd to owr Lordward, blissyd mot he ben, that 
wrowt swech grace in hir for many mannys profyte. An other tyme ther sent for hir an 
other worschepful lady that had meche meny abowtyn hir, and gret worschep and gret 
reverens was don unto hir. Whan the sayd creatur behelde alle hir mené abowtyn hir 
and the gret reverens and worschep that was don hir, sche fel on a gret wepyng and 
cryid therwyth rith sadly. Ther was a preyst herd how sche cryid and how sche wept, 
and he was a man not savowryng gostly thyngys, bannyd hir ful fast, seying unto hir, 
"What devyl eylith the? Why wepist so? God geve the sorwe." Sche sat stille and 
answeryd no word. Than the lady had hir into a gardeyn be hemself aloone and preyd 
hir to tellyn why sche cryid so sor. And than sche, supposyng it was expedient for to 
do, telde hir in parcel of the cawse. Than the lady was ille plesyd wyth hir preyste that 
had so spokyn ageyns hir and lovyd hir ryth wel, desiryng and preying hir to abydyn 
stille wyth hir. Than sche excusyd hir and seyd sche myth not acordyn wyth the aray 
and the governawns that sche say ther among hir mené.