611
612
613 
614
615 
616 
617 
618 
619 
620 
621 
622 
623 
624 
625
626 
627 
628 
629 
630 
631 
632 
633
634 
635 
636 
637 
638
639 
640 
641 
642 
643 
644 
645
646 
647 
648 
649 
650 
651 
652
653 
654
655 
656
657 
658 
659 

660 
661 
662 
663 
664
665 
666
667 
668
669 
670 
671 
672 
673 
674
675
676 
677 
678 
679 
680 
681
682 
683 
684 
685
686
687 
688 
689 
690
691 
692 
693 
694 
695 
696 
697 
698
699 
700 
701 
702 
703 
704 
705 
706
707 
708 
709 
710 
711 
712
713 
714 
715 
716 
717
718 
719 
720 
721 
722 
723 
724 
725 
726 
727 
728
729
730
731 
732 
733 
734 
735 
736 
737 
738 
739
740 
741 
742 
743 
744 
745 
746 
747 
748 
749 
750
751 
752 
753
754 
755 
756
757
758
759 
760 
761
762 
763 
764 
765 
766 
767
768 
769
770 
771 
772 
773
774 
775 
776 
777 
778 
779 
780 
781 
782
783 
784
785
786
787 
788 
789 
790
791
792 
793 
794 
795
796 
797 
798
799 
800 

801

N
N
 
 
 
 
 
 
 
 
 
 
 

N

N
 
 
 
 
 
 
 
 
 
 
 
 

N
 
 
 
 
 
 
 
 
 
 
 
 
 
 
 
 
 

N
N
 
 
 
 
 
 
 
 
 
 

N
 
 
 
 
 
 
 
 
 
 
 
 
 
 
 
 
 
 

N
 
 
 
 

N
 
 

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

N
N
N

N
 
 
 
 
 
 
 
 
 
 
 
 
 
 
 
 
 
 

N
N
N
N
 
 
 
 
 
 
 
 
 
 
 
 
 
 
 
 
 
 
 

N

Fro London sche went to Schene a three days beforn Lammes Day for to purchasyn 
hir pardon thorw the mercy of owr Lord. And, whan sche was in the chirch at Schene, 
sche had gret devocyon and ful hy contemplacyon. Sche had plentiuows teerys of 
compunccyon and of compassyon in the rememorawns of the bittyr peynys and 
passyons whech owr merciful Lord Jhesu Crist suffyrd in hys blissyd manhod. Thei 
that seyn hir wepyn and herdyn hir so boistowsly sobbyn wer takyn wyth gret merveyl 
and wondyr what was the ocupasyon of hir sowle. A yong man whech beheld hir cher
and hir cuntenawns, mevyd thorw the Holy Gost, went to hir, whan he myth goodly, 
be hymself alone, wyth fervent desir to have undirstondyng what myth be the cawse 
of hir wepyng, to whom he seyd, "Modir, yf it lyke yow, I pray yow to schewyn me 
the occasyon of yowr wepyng, for I have not seyn a persone so plenteuows in teerys 
as ye ben, and specialy I have not herd beforn any persone so boistows in sobbyng as 
ye ben. And, modir, thow I be yong, my desir is to plesyn my Lord Jhesu Crist and so 
to folwyn hym as I kan and may. And I purpose me be the grace of God to takyn the 
abite of this holy religyon, and therfor I prey yow beth not strawnge unto me. Schewith 
modirly and goodly yowr conceit unto me as I trust unto yow." Sche, benyngly and 
mekely wyth gladnes of spirit, as hir thowt it expedient, comendyd hym in hys entent 
and schewyd to hym in parcel that the cawse of hir wepyng and sobbyng was hir gret 
unkendnes agens hir maker, wher thorw sche had many tymys offendyd hys goodnes, 
and the gret abhominacyon that sche had of hir synnys cawsyd hir to sobbyn and 
wepyn. Also the gret excellent charité of hir redemptowr, be the whech thorw the 
vertu of hys passyon sufferyng and hys precyows blod schedyng sche was redemyd 
fro evyrlestyng peyne, trustyng to ben an eyr of joy and blisse, mevyd hir to sobbyn 
and wepyn, as no merveyl was. Sche teld hym many good wordys of gostly comfort, 
thorw the whech he was steryd to gret vertu, and aftyrward he ete and dranke wyth hir 
in the tyme that sche was ther and was ful glad to ben in hir cumpany. On Lammes 
Day was the principal day of pardon, and, as the sayd creatur went in the chirch of 
Schene, sche had a syght of the ermite whech led hir owt of Lynne whan sche went to 
the seward wyth hir dowtyr in lawe, as is wretyn be forn. Anon wyth gret joy of spirit 
sche offeryd hir self to hys presens, wolcomyng hym wyth alle the myghtys of hir 
sowle, seying unto hym, "A, Reynald, ye arn wolcome. I trust owr Lord sent yow 
hedyr, for now I hope as ye led me owt of Lynne, ye schal bryng me hom ageyn to 
Lynne." The ermyte schewyd schort cher and hevy contenawnce, neythyr in wil ne in 
purpos to bryng hir hom to Lynne as sche desiryd. He, answeryng ful schortly, seyd, 
"I do yow wel to wetyn yowr confessowr hath forsakyn yow for ye wentyn ovyr the 
see and wolde telle hym no word therof. Ye toke leve to brynge yowr dowtyr to the 
see syde; ye askyd no leve no ferther. Ther was no frend ye haddyn that knew of yowr 
cownsel; therfor I suppose ye schal fyndyn but lityl frenschep whan ye come ther. I pray 
yow, getith yow felaschep wher ye can, for I was blamyd for yowr defawte whan I led 
yow last; I wil no mor." Sche spak fayr and preyd for Goddys lofe that he wolde not be 
displesyd, for thei that lovyd hir for God er sche went owte thei wolde lovyn hir for 
God whan sche come hom. Sche proferyd hym to aqwityn hys costys be the wey 
homward. So at the last he, consentyng, browt hir ageyn to London and sithyn hom to 
Lynne to hy worschep of God and to gret meryte of her botherys sowlys. Whan sche 
was come hom to Lynne, sche obeyd hir to hir confessowr. He gaf hir ful scharp 
wordys, for sche was hys obediencer and had takyn upon hir swech a jurné wythowtyn 
hys wetyng. Therfor he was mevyd the mor ageyn hir, but owr Lord halpe hir so that 
sche had as good love of hym and of other frendys aftyr as sche had beforn, worschepyd 
be God. Amen.

Thys creatur, of whom is tretyd beforn, usyd many yerys to begynnyn hir preyerys on 
this maner. First whan sche cam to chirche, knelyng beforn the sacrament in the 
worschep of the blissyd Trinité (Fadir, Sone, and Holy Gost, oo God and three 
Personys), of that gloryows Virgine, Qwen of Mercy, owr Lady Seynt Mary, and of 
the twelve apostelys, sche seyd this holy ympne "Veni creator spiritus" wyth alle the 
versys longyng therto, that God schulde illumynyn hir sowle, as he dede hys apostelys 
on Pentecost Day, and induyn hir wyth the gyftys of the Holy Gost that sche myth han 
grace to undirstondyn hys wil and parformyn it in werkyng, and that sche myth han 
grace to wythstondyn the temptacyons of hir gostly enmiis and enchewyn al maner 
synne and wikkydnes. Whan sche had seyd "Veni creator spiritus" wyth the versys, 
sche seyd on this maner, "The Holy Gost I take to witnesse, owr Lady, Seynt Mary, 
the modyr of God, al holy cowrte of hevyn, and alle my gostly faderys her in erth, 
that, thow it wer possibyl that I myth han al knowyng and undirstondyng of the 
prevyteys of God be the tellyng of any devyl of helle, I wolde not. And as wistly not 
knowyn, heryn, seen, felyn, ne undirstondyn in my sowle in this lyfe mor than is the 
wil of God that I schulde knowyn, so wistly God mote helpyn me in alle my werkys, in 
alle my thowtys, and in alle my spechys, etyng and drynkyng, slepyng and wakyng. 
As wistly as it is not my wil ne myn entent to worschepyn no fals devyl for my God, 
ne no fals feith, ne fals beleve for to han, so wistly I defye the devyl, and al hys fals
cownsel, and al that evyr I have don, seyd, er thowt, aftyr the cownsel of the devyl, 
wenyng it had be the cownsel of God and inspiracyon of the Holy Gost. Yf it hath not 
ben so, God, that art inseare and knowar of the prevyté of alle mennys hertys, hafe 
mercy of me therfor and grawnte me in this lyfe a welle of teerys spryngyng 
plenteuowsly, wyth the which I may waschyn awey my synnys thorw thi mercy and 
thi goodnes. And, Lord, for thi hy mercy, alle the teerys that may encresyn my lofe to 
the and moryn my meryte in hevyn, helpyn and profityn myn evyn cristen sowlys, 
lyvys er dedys, visite me wyth her in erth. Good Lord, spar no mor the eyne in myn 
hed than thu dedist the blood in thi body whech thu scheddist plenteuowsly for synful 
mannys sowle, and grawnt me so meche peyne and sorwe in this world that I be not 
lettyd fro thi blisse and the beholdyng of thi gloryows face whan I schal passyn hens. As 
for my crying, my sobbyng, and my wepyng, Lord God almythy, as wistly as thu 
knowist what scornys, what schamys, what despitys, and what reprevys I have had 
therfor, and, as wistly as it is not in my power to wepyn neythyr lowde ne stille for no 
devocyon ne for no swetnes but only of the gyft of the Holy Gost, so wistly, Lord, 
excuse me ageyn al this world to knowyn and to trowyn that it is thi werke and thi 
gyfte for magnifying of thi name and for encresyng of other mennys lofe to the, Jhesu. 
And I prey the, sovereyn Lord Crist Jhesu, that as many men mote be turnyd be my 
crying and my wepyng as me han scornyd therfor er schal scornyn into the werdys ende 
and many mo yf it be yowr wille. And, as anemst any erdly mannys love, as wistly as 
I wolde no love han but God to lovyn above al thinge and alle other creaturs lovyn for 
God and in God, al so wistly qwenche in me al fleschly lust and in alle tho that I have 
beholdyn thi blisful body in. And geve us thin holy drede in owr hertys for thi wowndys 
smert. Lord, make my gostly fadirs for to dredyn the in me and for to lovyn the in me, 
and make al the world for to han the mor sorwe for her owyn synnys for the sorwe that 
thu hast govyn me for other mennys synnys. Good Jhesu, make my wil thi wyl and thi 
wil my wil that I may no wil han but thi wil only. Now, good Lord Crist Jhesu, I crye 
yow mercy for alle the statys that ben in Holy Chirche, for the Pope and alle hys 
cardinalys, for alle erchebischopys and bischopys, and for al the ordir of presthoode, 
for alle men and women of religyon, and specialy for hem that arn besy to savyn and 
defendyn the feith of Holy Chirch. Lord, for thi mercy blisse hem and grawnt hem the 
victory of alle her enmiis and spede hem in alle that thei gon abowtyn to thi worschep; 
for alle that arn in grace this tyme God send hem perseverawns into her lyvys ende. 
And make me worthy to be partabyl of her preyerys and hem of myn and eche of us of 
otheris. I cry the mercy, blisful Lord, for the Kyng of Inglond and for alle Cristen 
kyngys and for alle lordys and ladiis that arn in this world. God, sett hem in sweche 
governawnce as thei may most plesyn the and ben lordys and ladys in hevyn wythowtyn 
ende. I cry the mercy, Lord, for the riche men in this worlde that han thi goodys in 
weldyng; geve hem grace for to spendyn hem to thi plesyng. I cry the mercy, Lord, for 
Jewys, and Sarazinys, and alle hethen pepil. Good Lord, have mende that ther is many 
a seynt in hevyn whech sumtyme was hethen in erde. And as thu hast spred thi mercy 
to hem that arn in erthe. Lord, thu seist thi self ther schal no man comyn to the wythowtyn 
the ne no man be drawyn wythowtyn thu drawe hym. And therfor, Lord, yf ther be
any man undrawyn, I prey the drawe hym aftyr the. Me hast thu drawyn, Lord, and I 
deservyd nevyr for to ben drawyn, but aftyr thi gret mercy thu hast drawyn me. Yf al 
this world knew al my wikkydnes as thu dost, thei wolde merveylyn and wonderyn of 
the gret goodnes that thu hast schewyd me. I wolde that al this worlde wer worthy to 
thankyn the for me, and, as thu hast mad of unworthi creaturys worthy, so make al this 
world worthi to thankyn the and preisyn the. I cry the mercy, Lord, for alle fals heretikys
and for alle mysbelevarys, for alle fals titharys, thevys, vowtererys and alle comown 
women, and for alle myschevows levarys. Lord, for thi mercy have mercy upon hem 
yf it be thi wille and bryng hem owt of her mysgovernawnce the sonar for my preyerys. 
I cry the mercy, Lord, for alle tho that arn temptyd and vexid wyth her gostly enmiis, 
that thu of thi mercy gefe hem grace to withstondyn her temptacyons and delyvyr hem 
therof whan it is thi most plesawns. I cry the mercy, Lord, for alle my gostly faderys 
that thu vochesaf to spredyn as mech grace in her sowlys as I wolde that thu dedist in 
myn. I cry the mercy, Lord, for alle my childeryn, gostly and bodily, and for al the 
pepil in this world that thu make her synnys to me be very contricyon as it wer myn 
owyn synnys, and forgeve hem as I wolde that thu forgove me. I cry the mercy, Lord, 
for alle my frendys and for alle myn enmiis, for alle that arn seke specialy, for alle 
lazerys, for alle bedred men and women, for alle that arn in preson, and for alle creaturys 
that in this world han spokyn of me eythyr good er ylle and er schal don into the worldys 
ende. Have mercy upon hem and be as gracyows to her sowlys as I wolde that thu wer 
to myn. And thei that han seyd any evyl of me, for thi hy mercy, forgefe it hem; and 
thei that han seyd wel, I pray the, Lord, rewarde hem for that is thorw here charité and 
not thorw my merytys, for, thow thu suffredist al this world to vengyn the on me and 
to hatyn me for I have displesyd the, thu dedist me no wrong. I cry the mercy, Lord, 
for alle the sowlys that arn in peynys of purgatory ther abydyng thi mercy and the 
preyeris of Holy Chirche as wistly, Lord, as thei arn thin owyn chosyn sowlys. Be as 
gracyows to hem as I wolde that thu wer to myn yf it wer in the same peyne that thei 
arn in. Lord Crist Jhesu, I thank the for al helth and al welth, for al riches and al 
poverté, for seeknes and alle scornys, for alle spitys and alle wrongys, and for alle 
divers tribulacyons that han fallyn er schal fallyn to me as long as I leve. Heily I thank 
the that thu woldist letyn me suffryn any in this world in remissyon of my synnys and 
moryng of my meryte in hevyn as wistly as I have gret cawse to thanke the. Here my 
preyeris, for, thow I had as many hertys and sowlys closyd in my sowle as God knew 
wythowtyn begynnyng how many schulde dwellyn in Hevyn wythowtyn ende and as 
ther arn dropys of watyr, fres and salt, cheselys of gravel, stonys smale and grete, 
gresys growyng in al erthe, kyrnellys of corn, fischys, fowelys, bestys and leevys 
upon treys whan most plenté ben, fedir of fowle er her of best, seed that growith in 
erbe, er in wede, in flowyr, in lond, er in watyr whan most growyn, and as many 
creaturys as in erth han ben and arn er schal ben and myth ben be thi myth, and as ther 
arn sterrys and awngelys in thi syght er other kynnes good that growyth upon erthe, 
and eche wer a sowle as holy as evyr was our lady Seynt Mary that bar Jhesu owr 
savyowr, and, yf it wer possibyl that eche cowde thynkyn and spekyn al so gret reverens 
and worschep as evyr dede owr lady Seynt Mary her in erthe and now doth in hevyn 
and schal don wythowtyn ende, I may rith wel thynkyn in myn hert and spekyn it wyth 
my mowth at this tyme in worschip of the Trinité and of al the cowrt of hevyn, to gret 
schame and schenschep of Sathanas that fel fro Goddys face and of alle hys wikkyd 
spiritys, that alle thes hertys ne sowlys cowde nevyr thankyn God ne ful preysyn hym, 
ful blissyn hym ne ful worschepyn hym, ful lovyn hym ne fully gevyn lawdacyon, 
preisyng, and reverens to hym as he were worthy to han for the gret mercy that he hath 
schewyd to me in erth that I can not don ne may don. I prey my lady, whech that is 
only the modyr of God, the welle of grace, flower and fairest of alle women that evyr 
God wrowt in erth, the most worthiest in hys syght, the most leef, der, and derworthy 
unto hym, best worthy to ben herd of God, and the heyest that hath deservyd it in this 
lyfe, benyngne lady, meke lady, chariteful lady, wyth al the reverens that is in hevyn and 
wyth alle yowr holy seyntys, I pray yow, Lady, offyr ye thankys and preysyngys to 
the blisful Trinité for love of me, askyng mercy and grace for me and for alle my 
gostly fadrys and perseverawns into owr lyvys ende in that life one may most plesyn 
God in. I blisse my God in my sowle and yow alle that arn in hevyn. Blissyd mote God 
ben in yow alle and ye alle in God. Blissyd be thu, Lord, for alle thi merciis that thu 
hast schewyd to alle that arn in hevyn and in erth. And specyaly I blisse the, Lord, for 
Mary Mawdelyn, for Mary Egipcyan, for Seynt Powle, and for Seynt Awstyn. And, as 
thu hast schewyd ther mercy to hem, so schewe thi mercy to me and to alle that askyn 
the mercy of hert. The pees and the rest that thu hast beqwothyn to thi discipulys and 
to thi lovars, the same pees and rest mote thu beqwethyn to me in erth and in hevyn 
wythowtyn ende. Have mend, Lord, of the woman that was takyn in the vowtré and 
browt beforn the, and, as thu dreve awey alle hir enmyis fro hir and sche stod alone by 
the, so verily mot thu dryvyn awey alle myn enmiis fro me, bothin bodily and gostly, 
that I may stondyn alone by the and make my sowle ded to alle the joyis of this world 
and qwyk and gredy to hy contemplacyon in God. Hafe mend, Lord, of Lazer that lay 
four days ded in hys grave, and, as I have ben in that holy stede ther thi body was qwik 
and ded and crucifiid for mannys synne and ther Lazer was reisyd fro deth to lyfe, as 
wistly, Lord, yf any man er woman be ded in this owr be dedly synne, yf any prayer 
may helpyn hem, here my preyerys for hem and make hem to levyn wythowtyn ende. 
Gramercy, Lord, for alle tho synnys that thu hast kept me fro whech I have not do, and 
gramercy, Lord, for al the sorwe that thu hast govyn me for tho that I have do, for thes 
gracys and for alle other gracys whech arn nedful to me and to alle the creaturys in 
erth. And for alle tho that feithyn and trustyn er schul feithyn and trustyn in my prayerys 
into the worldys ende, sweche grace as thei desiryn, gostly er bodily, to the profite of 
her sowlys, I pray the, Lord, grawnt hem for the multitude of thi mercy. Amen."