1337
1338
1339 
1340
1341 
1342
1343 
1344 
1345 
1346
1347
1348
1349
1350
1351 
1352
1353 
1354 
1355
1356
1357 
1358 
1359
1360
1361
1362 
1363 
1364
1365 
1366 
1367 
1368 
1369 
1370
1371 
1372 
1373 
1374 
1375
1376
1377 
1378 
1379 
1380 
1381

N
 
 
 
 
 
 
 
 
 
 
 
 
 

N
 
 

N
 
 
 
 
 
 

N
 
 
 
 
 
 
 
 
 
 

   Ferthermore her folwyth a rygth notabyl matere of the creaturys felyng, and it is
wretyn her for convenyens inasmech as it is in felyng leche to the materys that ben
wretyn beforn, notwythstondyng it befel long aftyr the materys whech folwyn. It happyd
in a worshepful town wher was o parysch cherch and tweyn chapelys annexid, the
chapellys havyng and mynystryng alle sacramentys, except only cristenyng and
purificacyons, thorw sufferawns of the person, whech was a monke of Seynt Benetys
Ordyr sent fro the hows of Norwych, kepyng resydens wyth three of hys bretheryn in
the worshepful town befornwretyn. Thorw summe of the parischenys desyryng to
make the chapelys lych to the parysch cherch, pursuyng a bulle fro the cowrt of Rome,
fel gret ple and gret hevynes betwen the priowr whech was her person and curat and
the forseyd paryschenys that desyred to have funtys and purificacyons in the chapelys
lych as weryn in the parysch cherch. And specyaly in the on chapel whech was the
grettar and the fayrare thei wold have a funte. Ther was pursuyd a bulle, in the whech
was grawntyd a funte to the chapel so it wer no derogacyon to the parysch cherch. The
bulle was put in ple, and divers days wer kept be forme of lawe to prevyn whethyr the
funte, yyf it wer had, schuld ben derogacyon to the parysch chyrch or nowt. The
paryschenys whech pursuyd weryn rygth strong and haddyn gret help of lordshyp,
and also, the most of alle, thei wer ryche men, worshepful marchawntys, and haddyn
gold anow, whech may spede in every nede, and that is rewth that mede schuld spede
er than trewth. Nevyrthelesse the priowr whech was her person, thei he wer powyr,
manfully he wythstod hem thorw the help of summe of hys paryschenys whech wer
hys frendys and lovedyn the worshep of her parysch chyrch. So long this mater was in
ple that it began yrkyn hem on bothe sydes, and it was nevyr the nerar an ende. Than
was the mater put in my Lord of Norwych Alnewyk to say if he mygth be trety bryng
it to an ende. He laboryd this mater diligently, and for to settyn rest and pes he proferyd
the forseyd paryschenys mych of her desyre wyth certeyn condycyons, in so mech
that thei that heldyn wyth the person and wyth her parysch chyrche weryn ful sory,
dredyng gretly that thei that suyd for to have a funte schuld obteyn and getyn her
intent and so makyn the chapel eqwal to the parysch cherch. Than the preste whech
aftyrward wrot this boke went to the creatur of whom this tretys makyth mencyon, as
he had don beforn in the tyme of ple, and askyd hir how sche felt in hir sowle in this
mater whethyr thei schuld have a funte in the chapel or nowt. "Syr," seyd the creatur,
"drede ye not, for I undyrstond in my sowle, thow thei woldyn geve a buschel of
nobelys, thei schuld not have it." "A modyr," seyd the preste, "my Lord of Norwych
hath proferyd it hem wyth certeyn condycyons, and thei have a tyme of avysement for
to sey nay or ya whethyr thei wyl, and therfor I am aferd thei wyl not deny it but be ryt
glad to have it." Thys creatur preyd to God that hys wyl myt be fulfyllyd. And,
forasmech as sche had be revelacyon that thei schuld not have it, sche was the mor
bold to preyn owyr Lord to wythstonde her intent and to slakyn her bost. And, so as
owyr Lord wolde, thei obeyd not ne lyked not the menys whech wer proferyd hem,
for thei trostyd fully to han her entent be lordshep and be proces of lawe; and, as God
wolde, thei wer deceyvyd of her entent, and for thei wold han al thei lost al. And so,
blyssed mot God ben, the parysch cherch stod stylle in her worshep and hyr degré as
sche had don two hundryd yer befor and mor, and the inspiracyon of owyr Lord was
be experiens prevyd for very sothfast and sekyr in the forseyd creatur.