text2-37

2124 2125 2126 2127 2128 2129 2130 2131 2132 2133 2134 2135 2136 2137 2138 2139 2140 2141 2142 2143 2144 2145 2146 2147 2148 2149 2150 2151 2152 2153 2154 2155 2156		37 "Dowtyr, for thu art so buxom to my wille and clevyst as sore onto me as the skyn of stokfysche clevyth to a mannys handys whan it is sothyn, and wilt not forsake me for no schame that any man can don to the, and thu seyst also that thow I stod beforn the myn owyn persone and seyd to the that thu schuldist nevyr han my lofe, ne nevyr comyn in hevyn, ne nevyr sen my face, yet seist thu, dowtyr, that thu woldist nevyr forsake me in erthe, ne nevyr lofe me the lesse, ne nevyr do the lesse besynes to plese me, thow thu schuldyst lye in helle wythowtyn ende, for thu maist not forber my lofe in erthe, ne thu can han non other comforth but me only, whech am I, thi God, and am al joy and al blysse to the. Therfore I sey to the, derworthy dowtyr, it is unpossybyl that any swech sowle schuld be dampnyd or departyd fro me whech hath so gret meknes and charité to me. And therfor, dowtyr, drede the nevyr for alle the gret behestys that I have behite to the and to alle thyn and to alle thy gostly faderys schal ever be trewe and trewly fulfilled whan tyme comyth. Have no dowt therof." An other tyme whil sche was in Rome a lityl befor Cristemes, owr Lord Jhesu Criste comawndyd hir to gon to hir gostly fadyr, Wenslawe be name, and byddyn hym gevyn hir leve to weryn ageyn hir white clothys, for he had put hir therfro be vertu of obediens, as is wretyn beforn. And, whan sche teld hym the wyl of owr Lord, he durst not onys sey nay. And so weryd sche white clothys evyr aftyr. Than owr Lord bad hir that sche schuld at Cristemes gon hom ageyn to hir ostys howse ther sche was at hostel befortyme. And than sche went to a powr woman whech sche servyd at that tyme be the byddyng of hir confessowr, as is beforn wretyn, and telde the powr woman how sche must gon fro hir. And than the powr woman was ryth sory and mad gret mone for hir departyng. And than this creatur teld hir how it was the wil of God that it schuld be so, and than sche toke it the mor esily. Aftyrward, as this creatur was in Rome, owr Lord bad hir gevyn awey al hir good and makyn hir bar for hys lofe. And anon sche wyth a fervent desyr to plesyn God gaf awey swech good as sche had and sweche as sche had borwyd also of the brokebakkyd man that went wyth hir. Whan he wist how that sche had govyn awey hys good, he was gretly mevyd and evyl plesyd for sche gaf awey hys good, and spak ryth scharply to hir. And than sche seyd unto hym, "Richard, be the grace of God we schal comyn hom into Inglond ryth wel. And ye schal come to me in Brystowe in the Whitsunwoke, and ther schal I pay yow ryth wel and trewly be the grace of God, for I trust ryth wel that he that bad me gevyn it awey for hys lofe wil help me to payn it ageyn." And so he dede.