2524
2525 
2526 
2527 
2528 
2529 
2530
2531 
2532 
2533 
2534 
2535 
2536 
2537 
2538 
2539 
2540 
2541 
2542
2543 
2544 
2545 
2546 
2547
2548 
2549 
2550 
2551 
2552 
2553
2554 
2555
2556 
2557
2558
2559 
2560 
2561 
2562
2563 
2564 
2565 
2566
2567 
2568 
2569 
2570
2571
2572
2573 
2574
2575
2576 
2577 
2578 
2579
2580
2581 
2582 
2583 
2584 
2585
2586 
2587 
2588
2589 
2590
2591 
2592 
2593 
2594
2595 
2596 
2597 
2598 
2599 
2600 
2601
2602 
2603
2604 
2605

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 

N

N
 
 
 
 
 
 
 

N
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

On Corpus Cristi Day aftyr, as the prestys born the Sacrament abowte the town 
wyth solempne processyon, wyth meche lyth and gret solempnyté, as was worthy to 
be do, the forseyd creatur folwyd ful of terys and devocyon, wyth holy thowtys and 
meditacyon, sor wepyng and boystows sobbyng. And than ther cam a good woman be 
this creatur and seyd, "Damsel, God gef us grace to folwyn the steppys of owr Lord 
Jhesu Crist." Than that worde wrowt so sor in hir herte and in hir mende that sche 
myth not beryn it that sche was fawyn to takyn an hows. And ther sche cryed, "I dey, 
I dey," and roryd also wondirfully that the pepil wonderyd upon hir, havyng gret 
merveyl what hir eyled. And yet owr Lord mad summe to lofe hir and cherschyn hir 
ryth meche and haddyn hir hom bothe to mete and to drynke and haddyn ful gret 
gladnes to heryn hir dalyin in owre Lord. And so ther was a man of Newe Castel, hys 
name was Thomas Marchale, whech oftetymes bad this creatur to mete for to heryn 
hir dalyawns. And he was so drawyn be the good wordys that God put in hir to sey of 
contricyon and compunccyon, of swetnes and of devocyon that he was al mevyd as he 
had ben a newe man wyth terys of contricyon and compunccyon, bothe days and 
nyghtys, as owr Lord wolde visiten hys hert wyth grace, that sumtyme whan he went 
in the feldys he wept so sor for hys synnes and hys trespas that he fel down and myth 
not beryn it and telde the forseyd creatur that he had ben a ful rekles man and 
mysgovernyd, and that sore rewyd hym, thankyd be God. And than he blyssed the 
tyme that he knew this creatur and purposyd hym fully to be a good man. Also he seyd 
to the seyd creatur, "Modyr, I have her ten marke. I pray yow that it be yowr as yowr 
owyn, for I wil helpyn yow to Seynt Jamys wyth Goddys grace. And what that ye byd 
me gevyn to any powr man er woman I wyl do yowr byddyng, alwey o peny for yow 
an other for myselfe." Than, as it plesyd owr Lord, he sent a schip owte of Breteyn 
into Bristowe, whech schip was mad redy and arayd for to seylen to Seynt Jamys. And 
than the seyd Thomas Marchale went and payd the maystyr for hymselfe and for the 
seyd creatur. Than was ther riche man of Bristowe whech wolde not late the seyd 
creatur seylen in that schip, for he held hir no good woman. And than sche seyd to that 
ryche man, "Syr, yf ye put me owt of the schip, my Lord Jhesu schal put yow owt of 
hevyn, for I telle yow, ser, owr Lord Jhesu hath no deynté of a ryche man les than he 
wil be a good man and a meke man." And so sche seyde many scharp wordys onto 
hym wythowtyn any glosyng er flateryng. And than owr Lord seyd to hir in hir sowle, 
"Thow schalt han thy wylle and gon to Seynt Jamys at thi desyr." And anon aftyr sche 
was putt up befor the bischop of Worcetyr that lay three myle beyondyn Bristowe and 
moneschid to aper befor hym ther he lay. Sche ros up erly on the next day and went to 
the place wher he lay hymselfe, yet beyng in bedde, and happyd to metyn on of hys 
worschepfulest men in the town, and so thei dalyid of God. And, whan he had herd hir 
dalyin a good while, he preyd hir to mete and sithyn he browt hir into the bischopys 
halle. And, whan sche cam into the halle, sche saw many of the bischopys men al to 
raggyd and al to daggyd in her clothys. Sche, lyftyng up hir hande, blissed hir. And 
than thei seyd to hir, "What devyl eyleth the?" Sche seyd agen, "Whos men be ye?" 
Thei answeryd agen, "the bischopys men." And than sche seyd, "Nay, forsothe, ye 
arn lykar the develys men." Than thei weryn wroth and chedyn hir and spokyn angrily 
unto hir, and sche suffryd hem wel and mekely. And sithyn sche spak so sadly ageyn 
syn and her mysgovernawns that thei wer in sylens and held hem wel plesyd wyth hyr 
dalyawns, thankyd be God, er than sche left. And than sche went into the chirch and 
abood the comyng of the bischop. And whan he cam sche knelyd down and askyd 
what was hys wille and why sche was somownde to come befor hym; it was to hir gret 
noye and hynderawns inasmeche as sche was a pilgryme purposyng be the grace of 
God to Seynt Jamyswarde. Than the bischop seyde, "Margery, I have not somownd 
the, for I knowe wel inow thu art John of Burnamys dowtyr of Lynne. I pray the be not 
wroth, but far fayr wyth me, and I schal far fayr wyth the, for thu schalt etyn wyth me 
this day." "Syr," sche seyd, "I prey yow have me excusyd, for I have behestyd a good 
man in town to etyn with hym today." And than he seyd, "thu schalt etyn wyth me and he 
bothyn." And so sche abood wyth hym tyl God sent wynde that sche mytn seylen and 
had gret cher of hym and of hys meny also. And sithyn sche was schrevyn to the 
bischop. And than he preyd hir to prey for hym that he myth deyn in charité, for it was 
warnyd hym be an holy man whech had be revelacyon that this bischop schulde be ded 
wythinne the terme of two yer. And it fel so in dede. And therfor he compleynyd to 
this creatur and preyde hir to prey for hym that he myth deyin in charité. At the last 
sche toke hir leve of hym, and he gaf hir golde and hys blyssyng and comawndyd hys 
mené to lede hir forth in hir wey. And also he preyd hir whan sche come fro Seynt 
Jamys ageyn that sche wolde come unto hym. And so sche went forth to hir schip. 
Befor that sche entryd the schip, sche mad hir preyerys that God schulde kepe hem and 
preserve hem fro venjawns, tempestys, and perellys in the se that thei myth go and 
come in safté, for it was telde hir yyf thei haddyn any tempest thei woldyn castyn hyr 
in the se, for thei seyd it was for hir, and thei seyde the schip was the wers for sche was 
therin. And therfor sche in hir preyer seyde on this maner, "Almythy God Crist Jhesu, 
I beseche the for thi mercy, yyf thu wilte chastisyn me, spar me tyl I come ageyn into 
Inglond. And, whan I come ageyn, chastyse me ryth as thu wilte." And than owr Lord 
grawntyd hir hir bone. And so sche toke hir schip in the name of Jhesu and seylyd 
forth wyth hir felaschip, whom God sent fayr wynde and wedyr so that thei comyn to 
Seynt Jamys on the sevenyth day. And than thei that weryn agen hir whan thei wer at 
Bristowe now thei made hir good cher. And so thei abedyn ther fourteen days in that 
lond, and ther had sche gret cher, bothyn bodily and gostly, hy devocyon, and many 
gret cryes in the mende of owr Lordys Passion, wyth plentyuows terys of compassyon. 
And sithyn thei come hom ageyn to Bristowe in five days. And sche abood not long 
ther but went forth to the Blod of Hayles, and ther was schrevyn and had lowde cryes 
and boystows wepyngys. And than the religiows men had hir in amongse hem and 
mad hir good cher, saf thei sworyn many gret othys and horryble. And sche undyrname 
hem therof aftyr the Gospel, and therof had thei gret wondyr. Nevyrthelesse summe 
wer ryth wel plesyd, thankyd be God of hys goodnesse.