3401 
3402 
3403 
3404 
3405 
3406 
3407 
3408 
3409
3410 
3411 
3412 
3413
3414
3415
3416 
3417 
3418 
3419 
3420
3421
3422 
3423 
3424 
3425 
3426
3427 
3428
3429 
3430 
3431 
3432 
3433 
3434
3435
3436 
3437 
3438 
3439 
3440 
3441
3442 
3443 
3444 
3445 
3446 
3447 
3448 
3449 
3450 
3451 
3452 
3453 
3454
3455 
3456 
3457 
3458
3459 
3460
3461 
3462 
3463
3464

N

N
 
 
 
 
 
 
 
 
 
 
 
 
 
 
 
 
 
 
 
 
 
 
 

N
 
 
 
 
 

N
 
 
 
 
 
 
 
 
 
 
 
 
 
 
 
 
 
 
 
 
 

Thus, thorw heryng of holy bokys and thorw heryng of holy sermownys, sche evyr 
encresyd in contemplacyon and holy meditacyon. It wer in maner unpossibyl to writyn 
al the holy thowtys, holy spechys, and the hy revelacyons whech owr Lord schewyd 
unto hir, bothyn of hirselfe and of other men and women, also of many sowlys, sum 
for to ben savyd and sum for to ben dampnyd, and was to hir a gret ponyschyng and a 
scharp chastisyng. For to knowyn of tho that schulde be savyd sche was ful glad and 
joyful, for sche desyred in as meche as sche durst alle men to be savyd. And, whan 
owr Lord schewyd to hir of any that schulde be dampnyd, sche had gret peyn. Sche 
wolde not heryn it ne belevyn that it was God that schewyd hir swech thyngys and put 
it owt of hir mende as mech as sche myth. Owr Lord blamyd hir therfor and badde hir 
belevyn that it was hys hy mercy and hys goodnesse to schewyn hir hys prevy 
cownselys, seying to hir mende, "Dowtyr, thu must as wel heryn of the dampnyd as of 
the savyd." Sche wolde gevyn no credens to the cownsel of God but rathyr levyd it 
was sum evyl spiryt for to deceyvyn hir. Than for hir frowardnes and hir unbeleve 
owr Lord drow fro hir alle good thowtys and alle good mendys of holy spechys and 
dalyawns and the hy contemplacyon whech sche had ben usyd to befortyme, and 
suffyrd hir to have as many evyl thowtys as sche had beforn of good thowtys. And this 
vexacyon enduryd twelve days togedyr. And, lyche as befortyme sche had four owrys 
of the fornoon in holy spechys and dalyawns wyth owr Lord, so had sche now as 
many owrys of fowle thowtys and fowle mendys of letchery and alle unclennes as 
thow sche schulde a be comown to al maner of pepyl. And so the devyl bar hyr on 
hande, dalying unto hir wyth cursyd thowtys liche as owr Lord dalyid to hir beforntyme 
with holy thowtys. And, as sche beforn had many gloryows visyonys and hy 
contemplacyon in the manhod of owr Lord, in owr Lady, and in many other holy 
seyntys, ryth evyn so had sche now horybyl syghtys and abhominabyl, for any thyng 
that sche cowde do, of beheldyng of mennys membrys and swech other abhominacyons. 
Sche sey as hir thowt veryly dyvers men of religyon, preystys, and many other, bothyn 
hethyn and Cristen comyn befor hir syght that sche myth not enchewyn hem ne puttyn 
hem owt of hir syght, schewyng her bar membrys unto hir. And therwyth the devyl 
bad hir in hir mende chesyn whom sche wolde han fyrst of hem alle and sche must be 
comown to hem alle. And he seyd sche lykyd bettyr summe on of hem than alle the 
other. Hir thowt that he seyd trewth; sche cowde not sey nay; and sche must nedys 
don hys byddyng, and yet wolde sche not a don it for alle this worlde. But yet hir 
thowt that it schulde be don, and hir thowt that thes horrybyl syghtys and cursyd mendys 
wer delectabyl to hir ageyn hir wille. Wher sche went er what so sche dede, thes 
cursyd mendys abedyn wyth hir. Whan sche schulde se the sacrament, makyn hir prayerys, 
er don any other good dede, evyr swech cursydnes was putte in hir mende. Sche was 
schrevyn and dede al that sche myth, but sche fonde no relesyng tyl sche was ner at 
dispeyr. It can not be wretyn that peyn that sche felt and the sorwe that sche was inne. 
Than sche seyd, "Alas, Lord, thu hast seyd befortyme that thu schuldyst nevyr forsake 
me. Wher is now the sothfastnes of thy word?" And anon aftyr cam hir good awngel
unto hir, seying, "Dowtyr, God hath not forsakyn the ne nevyr schal forsake the, as he 
hath behyte the, but, for thu belevyst not that it is the spiryt of God that spekyth in thi 
sowle and schewyth the hys prevy cownselys of summe that schul ben savyd and summe 
that schal ben dampnyd, therfor God chastisyd the on this wise and maner, and this 
chastisyng schal enduryn twelve days tyl thu wyl belevyn that it is God whech spekyth 
to the and no devyl." Than sche seyd to hir awngel, "A, I prey the, prey for me to my 
Lord Jhesu Crist that he wyl vowchesafe to takyn fro me thes cursyd thowtys and 
spekyn to me as he dede befortyme, and I schal makyn a behest to God that I schal 
belevyn that it is God whech that hath spokyn to me afortyme, for I may no lengar 
duryn this gret peyne." Hyr awngel seyd ageyn to hir, "Dowtyr, my Lord Jhesu wyl 
not take it awey fro the tyl thu have suffyrd it twelve days, for he wyl that thu knowe 
therby whethyr it is bettyr that God speke to the er the devyl. And my Lord Crist Jhesu 
is nevyr the wrothar wyth the, thei he suffyr the to felyn this peyne." So sche suffryd 
that peyn tyl twelve days wer passyd, and than had sche as holy thowtys, as holy 
mendys, and as holy desyrys, as holy spechys and dalyawns of owr Lord Jhesu Crist 
as evyr sche had beforn, owr Lord seying to hir, "Dowtyr, beleve now wel that I am no 
devyl." Than was sche fylled wyth joye, for sche herd owr Lord spekyn to hir as he 
was wone to don. Therfor sche seyd, "I schal belevyn that every good thowt is the 
speche of God, blyssed mote thu Lord be that thu deynyst not to comfortyn me ageyn. 
I wold not, Lord, for al this world suffryn swech an other peyne as I have suffryd thes 
twelve days, for me thowt I was in helle, blyssed mote thu be that it is passyd. Therfor, 
Lord, now wyl I lyn stille and be buxom to thi wille; I pray the, Lord, speke in me 
what that is most plesawns to the."