5095 
5096
5097 
5098 
5099 
5100 
5101 
5102 
5103 
5104 
5105 
5106 
5107 
5108 
5109 
5110
5111 
5112 
5113 
5114 
5115 
5116 
5117 
5118 
5119 
5120 
5121 
5122 
5123 
5124 
5125
5126 
5127
5128
5129 
5130 
5131 
5132 
5133 
5134 
5135 
5136 
5137

N

The sayd creatur lay ful stille in the chirch, heryng and undirstondyng this swet 
dalyawnce in hir sowle as clerly as on frende schulde spekyn to an other. And, whan 
sche herd the gret behestys that owr Lord Jhesu Crist behite hir, than sche thankyd 
hym wyth gret wepyngys and sobbyngys and wyth many holy and reverent thowtys, 
seying in hir mende, "Lord Jhesu, blissyd mote thu be, for this deservyd I nevyr of the, 
but I wolde I wer in that place ther I schulde nevyr displese the fro this tyme forward." 
Wyth swech maner of thowtys and many mo than I cowde evyr writyn sche worschepyd 
and magnifyed owr Lord Jhesu Crist for hys holy visitacyon and hys comfort. And in 
swech maner visitacyons and holy contemplacyonis as arn beforn wretyn, mech mor 
sotyl and mor hy wythowtyn comparison than be wretyn, the sayd creatur had continuyd 
hir lyfe thorw the preservyng of owr Savyowr Crist Jhesu mor than twenty-five yer 
whan this tretys was wretyn, weke be weke and day be day, les than sche wer ocupiid 
wyth seke folke er ellys wer lettyd wyth other nedful occupasyon as was necessary 
unto hir er to hir evyn crystyn. Than it was wythdrawyn sumtyme, for it wil be had but 
in gret qwyet of sowle thorw long excersyse. Of this maner speche and dalyawnce 
sche was mad mythy and strong in the lofe of owr Lord and gretly stabelyd in hir feith 
and encresyd in mekenes and charité wyth other good vertuys. And sche stabely and 
stedfastly belevyd that it was God that spak in hir sowle and non evyl spiryt, for in hys 
speche sche had most strength and most comfort and most encresyng of vertu, blissyd 
be God. Dyvers tymys, whan the creatur was so seke that sche wend to a ben ded and 
other folke wende the same, it was answeryd in hir sowle that sche schulde not deyin but 
sche schulde levyn and far wel, and so sche dede. Sumtyme owr Lady spak to hir and 
comfortyd hir in hir sekenes. Sumtyme Seynt Petyr, er Seynt Powle, sumtyme Seynt 
Mary Mawdelyn, Seynt Kateryne, Seynt Margaret, er what seynt in hevyn that sche 
cowde thynke on thorw the wil and sufferawns of God, thei spokyn to the undirstondyng 
of hir sowle, and enformyd hir how sche schulde lovyn God and how sche schulde best 
plesyn hym, and answeryd to what that sche wolde askyn of hem, and sche cowde 
undirstond be her maner of dalyawns whech of hem it was that spak unto hir and 
comfortyd hir. Owr Lord of hys hy mercy visityd hir so mech and so plenteuowsly 
wyth hys holy spechys and hys holy dalyawnce that sche wist not many tymys how 
the day went. Sche supposyd sumtyme of five owrys er six owrys it had not ben the 
space of an owr. It was so swet and so devowt that it ferd as sche had ben in an hevyn. 
Sche thowt nevyr long therof ne sche was nevyr irke therof; the tyme went awey sche 
wist not how. Sche had levar a servyd God, yyf sche myght a levyd so long, an hundryd 
yer in this maner of lyfe than oo day as sche began fyrst. And oftyn tymys sche seyd 
to owr Lord Jhesu, "A, Lord Jhesu, syn it is so swet to wepyn for thi lofe in erth, I 
wote wel it schal be ryght joyful to be wyth the in hevyn. Therfor, Lord, I prey the, late 
me nevyr han other joy in erthe but mornyng and wepyng for thy lofe. For me thynkith, 
Lord, thow I wer in helle, yyf I myth wepyn ther and mornyn for thi lofe as I do her, 
helle schuld not noyin me, but it schulde be a maner of hevyn, for thy lofe puttyth 
awey al maner of drede of owr gostly enmye, for I had levar ben ther as long as thu 
woldist and plesyn the than ben in this worlde and displesyn the. Therfor, Lord, as thu 
wilt so mote it be."